قصيدة : حب الوطن . للشاعر / محمد أبو العبادي

حب الوطن ..

……. …….

الوطن ..

مش كرسى حاكم

او حكومة

او محاكم

الوطن شارع وحارة

والدفا ف البرد ساكن

الوطن وش الطيابة

اللى مرسوم ف الاماكن

زقزقات عصفور ف شجرة

والسنابل والغيطان

صدر ام كبير ضمامنا

فيه بنشعر بالأمان

لما نعطش منه نشرب

شهد سرسوب الحنان

الوطن اكبر واجمل

من كلام افصح لسان

اب يشقى عشان ولاده

ام تدعى بالهداية

صاحبك اللى ف عيد ميلاده

ابتديت اجمل حكاية

بنت سمرة بجلابية

ضحكة حلوة ومستحية

نظرة خاطفة وفرحة جاية

فصل اول م الرواية

ضحكة النونو الجديدة

امتدادك للنهاية

واما يوم يتعرى بدنك

الوطن يصبح عباية

يسترك ويدفى قلبك

يرفعك فوق الجبين

يرسم الضحكة العريضة

لو لقاك قاعد حزين

او يمد الايد وياخدك

للصلاة ف سيدنا الحسين

والبخور والريحة طالعة

مسك عطر الطيبين

مهما تبعد عنه ترجع

وانت مليان بالحنين

الوطن مش بس دنيا

الوطن ..

ع الارض دين

محمد ابو العبادى