قصيدة :حب نفسك . للشاعرة / أمل فرج

حب نفسك.

يعنى لو امكن ياحظ

السنة دى تبتسملي

والبس الفستان ستان

واشبك الدبوس بوردة

شوكها ميكعبلش شعري

وكعب عالي وطرحة بمبي

ويبقى جنبي..

يعنى لو امكن كمان

ع الكمان واللحن هادي

ويا فيروز الجميلة

يمكن ارقص جوة كوني

يمكن اشعر بالامان

اصل تكويني مقاوح

مهما ييأس ليه طموح

يعنى ممكن لو اروح

وانزل الشارع اشوف

كل وش حزين بيضحك

رغم مرك

يلقى تنهدته ف حضنك

او اشوف كل جارح

نادى ع المجروح وطبطب

مش يضرك

واللى ظالم صالح المظلوم

واكتر لو يحبك

نفسي اشوف الكون سكون

خيره ع المهموم بيطرح

والجعان شبعان بيفرح

حب نفسك….

بابتسامة ع الشفايف

يعنى ممكن انسى بكرة

وتبقى فكرة

لو الوّن كل الوان الخريف

واللى خايف

رايحة اطمن قلبه دايما

رايحة اقوله

ان الشتا جى بعده صيف

واللى بايع واللى هاجر

يعلىَ صوت نبض الحناجر

تنتهي الاحزان ببسمة

َوانت صابر

ف ماتقولوش دى صابها

جن ..او جنون

ما الظنون فالعقل واردة

وهى وردة

ويا تنهيدة و خطوة

حتى لو ف طريقها شاردة

ماتقولوش احلامها زايدة

روحى حابة ف يوم تتطوف

والسنة دي عليا شاهدة

ايوة هحلم مهما كانت الظروف