خاص بمسابقة شعر العاميه
الإسم / عماد البدرى محمد
جمهورية مصر العربيه
عنوان النص
.. حساب الشيك ..
هنرسم للحياه كفه
ونوزن فيها كام فرحه من الأوجاع
ميزان الدنيا فيه عِفه
بتكشف فينا مين خاين ومين شاري ومين بياع
فهاتلي معاك حساب الشيك
وخلي السعر بالتفاصيل
هتعرف إن أنا مديك
حسابى غير حساب الغير
رويتك من حنان دمى
عشانك شوفت روح الموت
فا ليه ناوي تزيد هَمي ؟
حنينك جوه روحي سكوت
حسابك خدته من عمري
وعمري عشته في الملكوت
فهاتلي معاك حساب الشيك
على عمرى اللى ما عشتوش
وشوف الباقي ليا وليك
وفاضل إيه وما بعتوش
هتلقا فى العيون نني
بتحضن دمع ماشفتوش
كلامك كان بيألمني
حنانك عمري ماخنتوش
فهاتلي معاك حساب الشيك
وسجل اني دافع كاش
حاولت كتير وكنت شاريك
لقيتك ليه رخيص ببلاش ؟
هتلقي جوه شريانك
براعم من هوا دمى
هتجري ف لحظه قدامك
تنادي أبويا يا أمي
فهاتلي ساعتها حساباتك
ولملم كل يوم فاتك
وداري الدمعه ف عيونك
وصوت الصرخه ف سكاتك
هتنده نبضي يسمع لك
هتصرخ خايف أرجع لك
هتلقا فى الفضا روحى
بتدعي ربى يشفع لك
هتكتب بالإدين إسمي
حروف شوفك متعرفهوش
وتوزن فوق ميزان رسمى
تلاقى الفرح ميحسوش
وكيف الكفه فى الموازين
فى موجة غدر ميطبوش
فا كان لازم لحد أمين
عشان الوزن ميغشوش
فا قوم راجع حساب الشيك
على عمرى اللى ما عشتوش
وشوف الباقي ليا وليك
وفاضل إيه وما بعتوش
.. عماد البدرى ..
