أنا وأنت والناس كلها
عايشين على تراب أرضها
وان خيرونا ترحلوا
وللا تناموا ف حُضنها
تهتف قلوبنا المغرمة
بالأرض ونجوم السما
بصوت ما يعرف هَمهَمه
وتقول يا ناس بنحبها
هى لٍنا ….. واحنا لها
بتعزنا ……. ونعزها
وياما دوقنا ف صغرنا
طعم الهَنا من كفها
وعشانها ضحى قبلنا
أبطال كتير من شعبها
وان كان على طعم المرار
نستحمله… من أجلها
بكرة الحياه تضحك لنا
بكرة الحياه تضحك لها
ويعود لنا ويعود لها
تاريخ جدودى ومجدها
والشمس تبقى ف السما
مستنظرة تسمح لها
توصل لجنة أرضها
وتقضى يومها ف حُضنها
مصر اللى ياما استحملت
ظلم الأعادى وأهلها
واللى انضرب بيها المثل
ف جمال عيونها وصبرها
قادرة تكون زى العسل
والكل يشرب منها
بس اللى واجب نعمله
تشوفنا دايما جنبها
ونكون لها ف الكون سند
وكتافنا تبقى ف كتفها
وان جار عليها ف يوم بشر
أو داس برجله رملها
يلقى الشباب بتعلمه
كام درس ف أصول حُبها
وتدوس عليه بنعل القدم
وتعرفه مين أبنها
اللى كَتب اسمه التاريخ
فوق الهرم
واللى رفع كتفه الجريح
سارى العلم
واللى هزم أدبه الرفيع
سوء القيم
واللى انفطم
على حب مصر وشعبها
***************************
رضا أبو الغيط
