حواديت الليل
**************
حواديت الليل المتضفر
بهموم الناس
بٍتْغَيب عقلى وتٍسْجٍنى
جوه الكراس
وبشوف العالم بظنونى
كراكيب…………. ولهيب
وديابة… بتاخد أماكنها
جوه السراديب
وتعالب ماشية بتتمخطر
من غير حُراس
بتدوس ع الحلم اللى بنيته
وانا لسه يادوب
عَيًل بٍتْسابق خطواته
فتافيت الطوب
ف زمان معطوب
مسجونة فيه الحرية
بين الأنفاس
والناس….. أموات
من غير أكفان تُسْتُر عيبهم
وتدارى سوءٍة ألاعيبهم
والناس أجناس
فيها اللى بيشبه لدبيحة
حواليها كلاب
مشتاقة …تاكل كَلاويها
بأقل حساب
وجناب الشيف المستنى
يعملها كباب
واقف فوق دٍكة أحزانه
حواليه أجراس
فيها اللى بيشبه توابيت
مدفونة فيها الاسرار
وحوار ..كان دار
بين الأحرار……
جوه الميادين اللى بتصرخ
من شبح الخوف
ورصاص الغدر اللى بيسكن
سراديب الجوف
وكلام مكسوف
ينطق بالحق اللى يساوى
قٍنطار الماس
ف زمان الفقر اللى بيغلب
اجدع احساس
الناس أجناس
فيها اللى بيشبه لقرود
بٍتعود
لزمان الغابة اللى بيصرخ
فيه الجميز
وبتزحف فيه العواجيز
جوه البراويز
وزمان السحر اللى بتشفع
فيه التعاوييز
لأوانى الظلم اللى مغيب
أفكار الراس
ومغمى عيون المتلفع
بهموم الناس
******************
رضا أبو الغيط
