عنوان المشاركة:
((خَلاص قَرَّرت أكتبلِك ))
…………………………….
لإنك أحلى شي في الكون وأنا مَفتون
هاكون مَمنون بإني مَرَّة أكتبلِك ومن قلبي
نقول باسم الله ونصلِّي وبنسَلِّم عالهادي
وأحاول أبتِكِر فِكرة وأكتب شِعر مش عادي
ما أصل الفكرة دي بِذرة بتبدُرها وترويها
فينشِدها يغنِّيها ويعزفها الطير الشادي
فتِطرَح كِلمة أو حكمة تكون زادي وزُوَّادي
في رحلة حُب مَبدأها بإني مدام مِصَدَّقها هخوض فيها بلاد وبلاد عشان أوصَل لضواحيكي
وضواحيكي يامَحلاها دليل واضح على إن الجمال إن مال لأطرافها ، أكيد مَركزها الجنة
و يِنعَم كَل مِن قَرَّب لأسوارِك
ونال شَرَف إنه يبقى ف وَفد زُوَّارِك
هيسعَد قلبُه ويرَفرَف ويصعَد للسما السابعة في يوم مايعيش جوار قلبِك
فمن فضلِك جيت أكتبلِك
وأقولك افتَحيلي الباب
لقلب بحُبُّه لسة شباب وعقلُه عُمرُه مااستوعِب بإنه القلب يتغَلِّب عليه واليوم هيكتبلِك
وهيقولِك ((أنا بحبك))
((أنا بحبِك)) دي كلمة ليها 100 معني
لإن الحب جَمَّعنا
وبعد ما كُنَّا في الدنيا لِنا قلبين
بقينا قلب واحد بس بين جسدين
((بحبك)) قلبي قالهالِك
أنا عارف بإن كلامي مُتَهالِك لكن والله أنا بحبِك
يبان حُبي وانا عايش عشان قلبِك
يبان حبي وانا باعمل حساب إنك أساسي ف كل حساباتي
يبان حبي بإني بقيت خايف منِّك
وخايف إني لو أرمِش ماشوفش النور ولو لحظة يا نور عيني
وكل حياتي وسنيني
ياماضي العُمر والحاضر
يا مستقبَل
أنا ف عرض الجميل يِقبَل
ويتعَطَّف ويتكرَّم
وأتشرَّف وأتكرَّم واحاول إني أكتبلِك
عشان خايف بإن كلامي يتأوِّل
فأنا هاحكي من الأوِّل
في يوم من أجمل الأيام ..
ومن أيام ماكان جُوَّة القلوب أحلام .
بدون أَوهام
قابِلت الشمس بتلالي بأنوارها ..
قابلت الجنة بنعيمها وأنهارها
وكان الفرح بيزين في أسوارها
لاقيت قلبي بلا استئذان بيختارها
وبيقولي على الحاصِل
جوابي كان تَحصيل حاصِل
لاقيته كمان بتواصل مع قلبِك بدون كلمات
بيتواصل مع الدَّقات
بدَقَّة قلب حبيتك
بدَقِّة قلب جُوَّة القلب خَبيتك
بدقة قلب جيت بيتك وخَدِّتِك جَريْ على بيتي
لإنك بردو حبيتي
وهَبِّيتي برِيحِك مِسك أو عَنبَر
فَ عَطَّر روحي وحياتي
فهاكتبلك تحياتي
وأكَمِّل بس على مَهلي
لإنك واللهْ تستاهلي
يا أحلى حكاية ب احكيها
وبأعزِفها وأغنَّيها وأكون بيها ملِك فِرعون
ومن تَحتي تسيل أنهار
وليل ونهار ماليني الشوق
وبَحلَم إني طاير فوق
ومش عايز ولا نفسي بإني أفوق
عشان لو فوقت هاكتبلك
قصيدة عُمري ياعمري
وعُمري يضيع وانا بكتِب
أنا والله مش باكدب
أنا قررت أتهنى
عشان هارسِم حروف إسمِك على ورقة من الجنة
وطبعا قلمي يتشرَّف لإنه خلاص هيتعَرَّف على ورقة من الجنة يكون فيها حروف إسمك
ويهمسلِك
((أنا بحبِّك))
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
