الشاعر / سعد محمد الاغا
مواليد مصر / دمياط/ عزبة البرج
اسم الاكاونت الفيس / سعد الاغا
رقم الموبايل واتس /01225706862
المشاركة / شعر العامية
خلصت القهوة
عارف
وانا واقف بعمل قهوة الصبح سمعتك
بتقولي اعملي معاك فنجان
بصيت على كيس البن الفاضي
ملقيتشي ف قلبه غير الأحزان
فا قسمت القهوة ما بينا يا صحبي ف كوبايتين
منا وانتا اتنين
ساندين على بعض وشايلين حمل حياتنا انا وانتا
على الكتفين
وان كاسك جالك ناقص نص
ب نصي ب يصبح لك نصّين
ما الدنيا بتصبح أحلا وسهله
ان كات مقسومه على الاتنين
فا قسمت القهوة ما بينا يا صحبي ف كوبايتين
ولّعت سيجارة وجيت لك جمبك
ب اسمع منّك
وانتا ب تحكي في كنّا زمان
أيام ما قلوبنا ما كاتش تبص الا لقدام
أيام ما صبانا الصابح كان متصالح
ضي نهاره على الأيام
أيام ما حلمنا نعدّي البحر
ونوصل بعد بلاد السحر
ونجمع منها الوان الطيف
ونطوف ونلف الدنيا ونجري
نحرّر برد الشتا ونبرّد حر الصيف
ولا كنّاش نعرف مستحيلات
ولا شئ ف حياتنا يا صحبي مخيف
يمكن علشان عيشناها انا وانتا
ب قلب نضيف
خلصت القهوة ؟
ما شربتش ليه؟!!
فكرتنا ليه بالماضي ايّاه ؟
أيام ما عنينا ان شافت ورد ترد قلوبنا تقول الله
دلوقتي اتغير لون الورد ولون النور مبقاش هوّاه
دلوقتي القلب الطيب ليه
مبقاش بيدق ف قلبه حياة
خلصت القهوة ؟
مشربتش ليه ؟!!
ولّا انتا عشان فنجالك جالك ناقص عمر غضبت عليه
طب كنت شاورلي
وانا اقطع من ايامي عشان خاطرك وامليه
دلوقتي انا ب ازرع شجر البن وما بيطرحش
عشان منتاش موجود تسقيه
دلوقتي غيابك سايب جرح
مفيش ولا شئ يقدر يشفيه
عارف
وانا واقف ب اعمل قهوة الصبح سمعتك
بتقولي اعملي معاك فنجان
بصيت على كيس البن الفاضي
ملقيتشي ف قلبه غير الأحزان
