خَلاوِيص ….. لِسَّه
………………
دُولاب الشِّعر كان مقفول
فَتَحتُه يا سِيِّدي عَلى فَجأه
بذقّ الدّرفه بِدِراعي
لَقِيت إحساسُه جِه فَجأه
لضَمت الكِلمه بالكِلمه
بِقَسوه سعات وبِالرِّقَّه
سعات الكِلمه بِتسَلِّي
كتير تِبعِد .. تِقول لأه
…………………….
وَوَقت الجَد بَلاقيها
تِقول المَعنَى وبِدِقَّه
ومَهما الطَّبع غَلَبني
مَتِستغربش
بِكُل الضِّيقَه والخَنقه
تِقولي سَلام عَلى كِيفَك
أُنادي عليها وبِزعقه
وبَترَجّاها ………
تِتِحايِل .. وتِتِمايِل
مَعاها الحَق تِتِمايِل
يا بنت الإيه ….. ! أنا عاجز
تِقولي خَلاص أنا جاهزه
عَزيزة النَّفس . بِمِزاجها
تِقفلي يا سِيِّدي عَ الوَحده
…………………….
وَلَمّا بخاف تِطَمِّنِّي
تاخُدني في حضنها أهدى
وَوَقت الفَرَح تِسعِدني
تِدُقّ الطَّبل مِيت دَقَّه
وعِند الحُب تِسحَرني
وتِخطَف مِنِّي أنفاسي
تِرجَّعهالي بِالشَّهقه
أتوه في الدُّنيا والمَلَكوت
ألاقي الجَنَّه في الشِّقَّه
…………………….
وَلَمّا الحُزن يِهاجِمْني
تِنادي الكِلمه عَ الدَّمعه
وتِوَجِّعني وتِدبَحني
تِدوس عَلى ضَهري
ماهو مَحني
ومَهما أصرُخ وأزِيد في الآه
بِسِيف مَسنون تِقَطَّعني
تِوَزَّع مِنِّي بِالحِتَّه
…………………….
أحِنّ لِكلمتَين حِلوين
وأكون محتاج لِشَوق وحَنين
تِفكِر قال تِصالِحني
تِطَبْطَب بَس ..! وأنا بَرضى
…………………….
ولو مَهموم .. تُوَنِّسني
تِغَيِّر لونها لِلبَمبي
تِجِبلي الضِّحكه مَرسومه
تِقولي مَعاها كام نُكته
…………………….
ياعم الكلمة من الآخر
حكاوي الدنيا في كتابنا
…………………….
وأنا …. آاااااه أنا
أنا في جِسم القَصيدِه التُّوب
وعارِف إمتى بَتهَجّى
وعايِش فَوق تُراب بَلدي
وباكتب عامي بِاللَّهجه
وأعيش الحِلم بِالمصري
مانا المصري ..
وبِالمصري الحَياه تِحلى
…………………….
وأحبّ النِّيل وأقول مَواويل
وفاكِر .. عَمّنا السَّقّا
وبَفطَر فول وطَعمِيَّه
ولهْلب بُقي بِالشَّطَّه
وبَوصَف والله في الحاره
وبضرب كُشري بِالدِّقَّه
…………………….
وبتكَلَّم عَن العِيله
ولَمّ الشَّمل والبَهجه
وأكَمِّل يَعني أحلامي
وأحثّ الأُمَّه عَ الوِحده
وأشَجِّع في الشَّباب تِبني
تِعَمِّر كُل ما بِتِنجَح
أقوم وأديها كام ورده
…………………….
أشوف البَسمه فَلّاحي
أدان الدِّيك مِن الشّبّاك
ونور الشَّمس جاي هناك
بِأحلى صَباح .. وفاس فَلّاح
بِيروي الزَّرعه مِن بَدري
وبيِصبَّح .. عَوافِي عَلَيكي يا حاجه
…………………….
صعيدي وشَهم وبَراعي
أصيل بِعاداتي وطِباعي
وواقف محمي بِدِراعي
وَوَقت الجَد والشِّدَّه
أقول الحَق وبِحِدَّه
…………………….
وأسمر جاي مِن النُّوبه
وعُمري ما أطلَع العِيبه
ومَهما وِصِلت لِلشِّيبَه
أَساس لِلرَّحمه والطِّيبَه
…………………….
وعَرباوي الحُدود والذَّوق
في أي مَكان .. جِبيني لِفوق
كريم .. لو عندي مِيت مَخلوق
وكُل الدُّنيا بِيه شاهده
…………………….
وبَحراوي وأقول .. أيووووه
بَلاقي غَريب
أقف جَنبُه كأني أَخوه
وأجدَع مِن الجدع حَبَّه
…………………….
وبَتعَلِّم مِن الأزهر
وألاقي جَوابي لو هاسأل
وأطَوِّل وأدعي في السَّجده
وبَحمد رَبّي عَ النِّعمه
وباخُد ديني بِالحُجَّه
…………………….
وعايِش يَعني في الواقِع
بَشدّ في حَبل أفكاري
بِكُل بَساطه مش فارقه
…………………….
ومش هاقفِل دولاب الشِّعر
هَزود تاني في رفوفه .. وهابني البَيت
ولمّا تِقولوا .. إيه؟ خَلاوِيص؟
هَرُدّ وأقول .. أَكيد لِسَّه …….
……………………
مسابقة الشعر العامي
الإسم / شاذلى محمد عبدالرحمن حسين
محافظة البحر الأحمر – مدينة الغردقة
