خُطا الدراويش
يمكن ما ليش
غير قلب عاشق للغنا
تايه ف حلقة ذكر
جارر سنينه وراه
افرد جناحك يا ولي
وضمني جواه
خبيني ف الضمه
خليني كل الناس
والصحبه واللمه
دوِّب ف روحي الآه
لملم خُطا الدراويش
دا انا كل مريدينك
آمنت بالمصطفي
وبشرعه وبدينك
سَكَر القُليب من النور
الكل شافه بيتقسم ..
…… الا انا شيفاه
حاضن قلوب فيها الحنان لله
الشهقه طالعه تشق صدر الليل
ودموعه سايله للسما سبقاه
عشمان يطل الفجر
كما ورد جف نداه
مرميه روحه على الرصيف
عُقب مرمي ف آخر الأنفاس
دخانه غُصَّه بيخنق الاحساس
تَبت يدين كل اللي ساب
دمه علي الطريق ينداس
كل السكك فيها ناس
وعيونه ماشيه تهز ف الغربال
تسكن قلوب مليانة نور
تسقط قلوب مسكونه شر
تحيا قلوب عاشقة الحياه
قلوب بتغزل من فروع الشمس أطواق للنجاه
م الخوف بتنجدنا
مدد يا سيدنا
