الإسم : عبدالله رشاد التلباني
اسم الشهرة : ” عبدالله التلباني”
السن : 20 سنة
المحافظة: محافظة دمياط
نوع العمل : شعر عامية
اسم العمل : دفتر نواقص
دَفْتَر نَوَاقِص . .
أكتِب عَ للِي قَرَب يِنتِهِي
وَلَا أَعد فِي الليِ فَاضِل . . !
طُول مَا السحب بيشتِهي
المَجايب فبرضو فَاضِل
حَاجَة نسِيت تَانِي تِكتِبهَا
طُول مَا الحَاجَة بتتصَنف
لمعايب يِبقِي مُش هتجِبها
الفِكرَة بِتروح فِي الضِل
قَيدهَا عَندَك فِي دَفتَر النَوَاقِص
عشان لَمَا تِخلَص تفتكرها
مُش كُل حَاجَة اللِي عَند غِيرَك
تِبقَي عِيِب إِنهَا خَلصَانه فِيك
اللي عَندَك تَخْلِيه قُدامَك نَاقِص
فَبُص للي معاك قَبل اللي ليِك
كُتر زَاد عَطَشَك هينشِف بيِرَك
قِلة اللي عَندَك فِي بَرَكتُه
عَن كُتر حَاجَة بِبَركِة عَدَمهَا
السَتر اللي بيلِم فِي خِيرَك
وَلَا لِخيِر بِيخلَص فِي وَقتُه
كُل الصِفَات المَعدُومَة مَا بِينا
مَوجُودَة عَند غِيرنَا بِزِيَادَة
كُل الأَخلَاق اللي أَصلَهَا دَيِنَا
فِيه اللي بيسِيبهَا تِنقَص فِيه
مَع إن غيره بيخليها لِعَادَة
ننصح فِي غِيرنَا وبإستفادة
بس مفيش فَايدَة مِن نُصحنا
كُل الفَوَايِد بتكون مِتعادة
طِب لِيه نِعِيد ونكرر هَمنا . . . ؟
يِنقَص قُعَدنا بَعد شُرب الشَاي
يِرُوح مننا خُوفنَا حَتي عَليه
لو يِمشِي الحَاضِر باللي جَاي
فِضل المَاضِي يِلغِي اللي فِيه
وَلَا قَرر حُضُور وَجَعُه بالنَاي
طب ننسي نعدي علي اللي فَايت
وَلَا نجِيب فِي سيره اللي بيموت
كُل اللي فَات إتصَرف قُدامنا
مُش قُدمنَا اللي يِصرِف البَايت
كُل اللي رَاح كَان قَاعِد معانا
نتمني كُونُه معانا بِصوُت سِكُوت
بناخد بَالنَا وإحنا بنخلص ليه . . ؟
ولما بننقص بَالهُم مُش ويانا
العُمر بِيخلَص فِي الدراء
وبيعلن سِن موُتُه للزمَن
رَبِط الِلِي يخِلَص بالِشراَء
يِخلَص حاجاَت مُش بالِتمَن
فَرق اللي بيرمي ومش عاوِز
عَن حَد كَان عاوِز المَرمِي دَه
نَاقِص طَمع وِفي الطمَع جَاوِز
وكُل اللي بيفرط مُش مِحتَاج
المِحتَاج رَافِض يِفَرط فِيه
كُل الأدوِيَة تنقص مِن العِلَاج
ومفيش رشطه مِن غِير نَوَاقِص
صَنف مِن الدوَا بنلف عَلَيه
وبَعد مَا بندور بناخد البدايل
كُل النوَاقِص بتعوض نَوَاقِص
وإحنا لسه بِنُقُول مُش عايز بَديِل
وِنرجَع نِقُول بديله نَاقِص ليه . . ؟
بَلاش تفرَط لو معاك وِتنَقصُه
كُل اللي ضَاع مننا بنتمني نلقِيه
سيب اللي قَطَع وَرَقُة وقصقصه
بُكرَة هيترجي النَّوَاقِص تِلزَق فِيه
اكتبلي اللي ناقصك ولقيته
باللي عاوزه معاك ومش مَوجُود
وَلَا اللي كَان زِيَادَة ونقصته
ووقت أَما يِخلَص قُولت دا مَوجُود . .
متفاجئ بِحَاجَة بقت نَوَاقِص
وَلَا بَقِيت بتنقص بِشَكل كبِير
كُل اللي قُولنَا لِيه بِنَاقِص
كَان جَايِب معاه خيرين بِخير
شوفلي اللي قَرَب يِخلَص مِني
قَبل مَا تِعد فِي اللي فَاضِل عَندِي
أَعمَار كتيرة ضَاعِت مِن سِنِي
أَنَا لسه بفرَح وِبقُول بَقيَ عَندِي
هلاهيل هِدوم نَاقصة مِ الأَذوَاق
أَحزَان كتيرة بِتخَلص مناديلي
باقِة غَرَام سَرقِتهَا مني الأشواق
أَمرَاض خَطِيرَة بالورث بتجيلي
بعاني مِن النقص التدريجي
وشايفني لسه مِن الصورَة الكَاملَة
مُش كُل وَجَع هيبان فِي تهريجي
وَلَا بيظهر فِي التحاليل الشاملَة
الفَرحَة بتكمل نقصنها أَحزَان
وِالحُزن بيخلي الشَّخص مَرِيض
وِالهَم بِمَرضُه بيملي الخَزَّان
نُقصَان ضِحِك ببُكي وعييط
إيه اللي أَغرَب مِن دَفتَر فاضِي . . ؟
صَفحَاتُه تتملي شخابيط . . !
يتملي بالنواقص مِن المَاضِي
بنزعل لَو النقص هيكملنا
لِمُجَرد إنه فِي الدنيَا عَامِل
حَاجَة بتلهي . . !
كَملنَا مِن بَعض اللي مُش كَامِل
ونقصنا مِن بَعض لمَا قُولِنَا
كُل شِئ إنتَهَى . . .
