قصيدة : دنيا غدارة . مسابقة الشعر العامى بقلم / فتحي عبد المنعم عبد العال بكير

( دنيا غدارة )

غدارة الدنيا غدارة . . القلوب فيها تعبانة

والكل بيكلم نفسه ماشي ومش طايق نفسه

والناس كانها . . سكرانة

غدارة

غدارة وغدرها على الانسان . . الطيب فيها ملوش مكان

بتلعب بيه يمين وشمال

ولما يديها الامان . . تدوسه زي السيجارة

غدارة

غدارة وسيفها كمان بتار اصلها دنيا ماليها امان

اللي متغطي بيها عريان

لو مشينا فيها يمين بتحدفنا على طول شمال

دايما بتكسر . . الإشارة

غدارة

غدارة بس مع الغلبان و الخاين تاخده بالأحضان

وتحايله وتلاعبه كمان وتفتح له الف مجال

لو كان راكب على حصان في ثانيه . . تركبه طيارة

غدارة

العيشة فيها دموع وعذاب بتجلد فينا بالكرباج

لو قلنا في يوم فيها الصدق تقولك على طول كداب

وتحكم علينا بالسجن ونروح له فورا . . بزيارة

غدارة

غدارة واحنا فيها أغراب الاهل فاتونا والأصحاب

في الفرح الكل احباب كله يجامل وهو كداب

وفي حزني ما دق حد الباب وحيد وساكن . . في مغارة

غدارة

غدارة وكل يوم بحال والحب فيها محال

دايما غالي على الغلبان

نقوله تعالى يقول مش جاي انا عندك ما ليش مكان

مكاني في فيلا . . وسيارة

غدارة

غدارة الدنيا بقت زحمة والظروف على الكل بقت

وحشة والناس ما بقتش فيها رحمة

غني ما بيطلع صدقة بخيل وبيشحت . . السيجارة

غدارة

غدارة وفيها كتير مظاليم ناس عايشة بملاليم

وتقول يفرجها رب كريم

وناس عندها فلوس ملايين أكلهم فجل وجرجير

بخلاء والنفس . . طماعة

غدارة

دنيا غريبة وما لها زي

الاصيل فيها ميت حي

والندل لو كان ترمس نيئ يتاكل ويبقى حلو

يا خوفي من الزمن اللي جاي

دي علامات . . القيامة

غدارة