قصيدة : راجل عمولة . مسابقة الشعر العامى بقلم / محمود السيد محمود عبد الوهاب

قصيدة ” راجل عمولة “

#راجل_عمولة

#آيوه_عادي_استحملي_علشان_عيالك

ليه تملي بتشكي حالك ؟!

فيكي ايه ما تقولي مالك ؟

عايشة عيشة مـ اللي هيٌَ .. 

جوا دنيا مزهزهه لك

إوعي تتغري بجمالك !.

إحمدي ربك وبوسي كف إيدك وِش ضهر

ده انتي جت لك شبكة تحفة

واندفع لك أحلى مهر ..

والفرح بقوا يحكوا عنه من قرايبك يجي شهر

إيه اللي فيها لو تعيشي ..

طول حياتك ويل وقهر ؟.

فاكرة نفسك ليكي عيلة ولا يعني ليكي ضهر ؟!

إنتي مين أصلاً جنابك ؟!

ولا يعني بنت مين ؟

إخرسي خالص وعيشي زي عيشة الخدامين

إرضي بالمكتوب يا حلوة زي باقي المقهورين .

مهما عيشتك تبقى مُرة ..

إنسي إن فـ بيت أبوكي ..

كنتي ملكة وعايشة حرة

موتي في اليوم 1000 مرة

مش قضية ..

لو يبات بالشهر بره ..

مش قضية ..

لو يجيب لك حتى ضُره ..

برضوا عادي مش قضية .

المهم يعيش شبابه

تبقي خدامة جنابه

شيلي فوق راسك ترابه

ترضي أمه وترضي أخته ..

وترضي ميتين اللي جابه !.

واوعي تنسي ان انتي جارية ..

مهما هانك ولا خانك ولا باعك .. تبقي شارية

هو يتحوٌل عليكي .. وانتي عصفورة كناريه .

ده انتي مالكيش الا جوزك ..

إوعي مرة مهما يعمل يعلى حسك تلوي بوزك

حتى لو نكد عليكي قولي حاضر لو يعوزك .

وان فتحتي مرة بُقك ..

تبقي تستاهلي اللي نابك .

آيوه عيشي اتنيلي علشان عيالك ..

مش مهم يهين كرامتك ..

كل يوم والتاني رايحة وبهدومك عند مامتك

مثٌلي إنك سعيدة وري للناس ابتسامتك .

عيشي مكسورة الجناح ..

خلٌي دمعك ولا دمك تحت أمره مُستباح .

كوني سلعة من الرخيصة

عيشي دور انك فريسة

مهما يعمل فيكي عادي ..

تبقي برضوا عليه حريصة .

لاجل ترضي مجتمع ظالم عقيم

لاجل يرضى شخص فعله ..

في الأساس شيطان رچيم

اللي لو كان عنده رحمة ..

كان يبان إنسان رحيم .

فتٌحي ودانك كويس واسمعي خُلاصة الكلام ..

لو هتنوي تعيشي فعلا عيشي لكن باحترام

إنتي وصى عليكي ربك والنبي عليه السلام .

يلعن العيشة وسنينها لمٌا تخلى من الأمان

يلعن اللقمة اللي تنزل جوا جوف ويكون مُهان

يلعن الظالم وظلمه من هنا ليوم القيامة

طز في الشخص اللي عايش ..

وسط أهله بدون شهامة

اللي يقبل لو للحظة تبقي عايشة بدون كرامة .

حتى لو قرر يسيبك .. ايه يعيبك ؟

في النهاية مش هتاخدي ..

مـ الحياه دي غير نصيبك

واللي يقبل يوم بذُلك ده استحالة يكون حبيبك.

واللي ناسي إنك انتي .. غصب عنه بنت ناس

واللي جايبك تبقي جارية ..

عند عيلته من الأساس

واللي كان يُشعر بلذة .. لو يشوفك مُستَفَزة

واما يتباهى بخضوعك كله فخر وكله عزة .

اللي واخد في القساوة والغباوة دور بطولة

واللي مش فاهم وجاهل ..

يعني ايه معنى الرجولة

باختصار ان احنا فعلاً …

#محتاجين_راجل_عموله .