قصيدة (ربك ما أرادش) مسابقة الشعر العامى بقلم / راندا عطوان محمد عبده

خاص بالمسابقه
الاسم راندا عطوان محمد عبده
جمهوريه مصر العربيه
محافظة الدقهلية
المنصوره
نوع الشعر عامى

صفحة الفيس
مس راندا عطوان

ربك ما أردش

حاسبى يا حاجه يالا عدى
حاسب يا أسطى حبه وهدى
يالا حبيبتى بسرعه مدى
إيدك إيدى إسندى شدى
لو مش قادره أخدك على كتفى
تاخدى عيونى كان من ودى
تشكر يا بنى ماجات من ولدى
عارف إبنى لسه ناسينى
عارف ابنى ما يعرف فينى
ممكن اقولك على اللى كاوينى
على اللى تاعبنى على جارحنى
على رمانى ومبكينى
والا اقولك كتر خيرك
إلحق رزقك واطعم طيرك
ذنبك إيه فى عمايل غيرك
إهدى حبيبتى أنت بهية
سامع قلبك صرخه قويه
نبضه حزينه على الدنيا آبية
حاسس وجعك كانه بى
قادر ربك وصل الحِنية
طيب يا إبنى إن قابلك ابنى
قوله كمان…..فاكر والله زمان
لما كانت بتفاجئك بالرمان
قفص عصافيرك أشكال وألوان
تشجيعها لك وسط الصبيان
اول مكتوب فى حب حنان
و قبل النوم وكان يا مكان
آه ..آه.. كان يا ما كان
قوله كمان… والله زمان
فاكر حضنك يا أما أمان
بالذات لما تكون راجع ندمان
قوله حضن أمك مليان بحنان
فاتح دراعاته بالمجان
لسه أمك داعيه لك الرحمن
قلبها عمره ما يقسى مهما كان
قوله خلاص……………
خلاص ريح الموت بتهب
بينها وبينى فركة كعب
و انت مالك عرش القلب
مالك عمرى و كل الحب
خايفه عليه من غضب الرب
قوله علم ابنك يعطى ما يفكرش
قوله على أمه ما يتغيرش
قلبه علىها ما يتقلبش
وإن قالت آه ما يتكدرش
دا حضن الأم ما يتقدرش
قوله أمك للموت على الفرش
شايفه ملايكه حول العرش
وشيفاك جاى بتجرى وما بتلحقش
و ما تزعلش ولا تتأثرش
داعيه لك ما تتعذبش
واللى دوقته أبدا ما تدوقش
وقوله كمان يجى يزورنى
يقرا الفاتحه ويسمعنى
أصل بعاده أيوه واجعنى
كان نفسى آخر حد يودعنى
لكن ربك ما أردش