................ مد إيدك بالمودّه للغريب زي القريب ربما تلاقي الحبيب ف اللي أبعد حد عنّك ربما تلاقي اللي يحقد هوّ اقرب حد منّك مد إيدك بالمودّه والحنان وبحُسن ظنّك عيش مع العالم كأنك شايف الجنّه ف وجودهم مد إيدك خد بإيدهم دا الجميع محتاج كفاله كون لواحدك بس حاله من حالات الإنسانيه إللي تدّي الغير وشايفه إن فعل الخير عباده رح تلاقي المولى ذاته م السما يدّيك زياده خلّي من حضنك وساده للي مد الإيد وعاز كون تمللي ف انحياز للي قطر الجوع فرمهم واللي مش لاقيين ف يومهم لقمه تسند جوع عيالهم واللي مش شايفين قُبالهم إلا قصر لكل ظالم واللي صوت عصافير بطونهم سيمفونيّه من المظالم دي البطون الخاويه تشبه دقدقات طبل العوالم كون لدعوتهم سلالم طلعه من حبّات قلوبهم لمّا أعلا من السحابه كون رسول يحمي الغلابه من وشوش عميّه القلوب واللي عريان كونله توب يستره من برد طوبه دفّي بدنه من الرطوبه يومها بس ح تلقى نفسك ينقصك جناحين وتصبح وسط كل الناس .. ملاك
