قصيدة : رَف السنين . مسابقة الشاعر العامية بقلم / محمد البياع

((رَف السنين))
الشاعر محمد البياع
نَسْرت مْن توبي القَديم الرُقعتين البَهتانين
وبَدأت أخيط ذكريات العُمر ف كْفوف الأمل
فَصلت توب مَلهوش مَثيل
بْيلْم مِن دَارنا القُماش
وبينسجُه ضحك السِنين
ولَقيتني قَاعد جَنب زير مَدهون مَشاع
والماية فاردة الضحكتين
ضحكة رضا وضحكة حنين
والكُوز بْيوهب مَايْته
لعابر سَبيل
زَقيتني عَند سْرير قَديم
فاوقعت مَطرح ماإتولدت ف وِسط دَار الطَيبين
الصُورة فوق الشَقْشَقة مْتدَلدقة
ف حِجر الدُولاب
والمَريلة ولعب الصحاب
مطبقين فوق الرفُوف
وبَدأت أشوف لَبيريق وضوء
وصَنية عَايقة ونحتها صَبار
بيلم م العُمر الهِزار
ويصب شوق مَحروم أمل يروي الصدور بالطبطبة
والمسطبة بتنوح فُراق
وأنا عِشقي دَاق الذكريات
وإستطعم الحُضن اللي فات
تَكعيبة سَايقة السَرسَبة
لباب الجِيران
عَنقود ورا عَنقود
من غير حُدود ولا سُور حقوق
الكُل ذوق حلو اللسان
وحَصيرة الصبح البريء
بتصلي فوق ضَهر الطريق
وبتختم الفَرض بفروض
والسِرب فوق المآذنة
بيحوم ينبه ع الصلاح
ويقوله حي على الفلاح
اللهُ أكبر يازمن عِشق الندا
الأرض فَاردة الأيدة عَربون شِرا
واللي إشترى طَرح الغِيطان
سَلم دَهاليز الزكا للفلاحين
إذ نبدأ الرِزق الحَلال
والقُطن ف جيوب العيال
ياشقشقات الصبح ف فروع الشجر
ياسَرسبات الرِزق من جيب المَطر
ياتنهيدات القلب ع العمر اللي راح
والضَهر عَاب لما إنكسر
ياتوت وابور قضبانه فاردة شعرها ع السكتين
فلاح وسارح ف الخيال
الزرعة مع رزق العيال
تَحويشة الشيش م اللي فات
بتضفر الذكرى بآهات
ياشمس مالك والملاية الطيبة
صَهدتي رِيق الأنسجة
ورَويتي ليه نَبض الخِيطان
بشعاع أمل
وإنتِ اللي ناوية تهجري؟
هما سافروا ياوَتد
فكوا الرباط من خَيتك
عِشق السنين اللي إتولد
جنب الشجر
مَنحوت على جدور الفروع
لكنه ماع
والنبض شاف الذكرى جاع
ونَسيج دولاب الروح بَهت
ومعدش يصلُب ضَهره توب
ولاترزي يرضى يفَصله
كُل اللي مَاتوا ف الطريق
كان نِفسهم يوم يوصلوا
الشاعر محمد البياع
اسم القصيدة
(رَٕف السنين)