سافرت كتير ...... مع انى سافرت كتير وقابلت كتير ومشيت مشاوير بالطول والعرض ودخلت بحور تسحبنى ف جزر ودخلت بحور ترمينى ف مد لفيت ف بلاد وبلاد وبلاد ووصلت ياجوز لحدود الارض وقابلت كتير انما فعلا حاسس مقابلتش ابدا حد ما قابلتش زى عيونها عيون ولا زى جناين ضحتها البنت اللى الروح حبتها تشبه للحور ف خدودها الورد بجد ربيع بيزين تفاصيل التقاطيع وصفوف اللولى اللى بتظهر تشبه لمداين م البلور لحظة ما تطل على العالم الليل يتحول فجأة لنور ونشم النسمة اريج وعطور با تمنى اخدها ف احضانى اداريها من العالم كله وان حد لمحها ارش بخور وعشان ماهى فعلا شبه الحور ومكانها بيشبه للجنة انا قلبى ملاك لحظة ما تطل من الشباك تتعلق عينى بحبل غسيل يمكن ساعتين يمكن اكتر وبرغم مرار ايامى بادوق من نظرة عينها حفان سكر اسرح فى عيونها اللى بتسكر تدخل مكسوفة على الاوضة وانا واقف مش قادر امشى لازق ف مكانى ما بتحركش وان حتى حاولت كمان ارمش يعصانى الرمش وما بيرمش م انا عينى اترفعت ما بتنزلش وازاى اجبر عينى تغير نظرتها عشان تنظر ف الضد من بعد ما وصلت اعلا مكان بقى فعلا صعب تشوف الارض مع انى سافرت مع انى قابلت انما ما قابلتش فعلا حد يشبه لجناين ضحكتها ولا رقتها ولا طعم الضى ف نظرتها واكمنى من الروح حبيتها ما بشوفش بعينى يادوب غيرها اتمرجح مع ضى الضحكة واتملى بعينى ف تفاصيلها وكأنى الطفل اللى بيحبى وما شافش من العالم غيرها او هى وبس ف كل الكون من يومها القلب صبح مجنون وما عادش مجال للعقل خلاص ما هى صبحت فعلا كل الناس مع انى سافرت محمد ابو العبادى
