الأسم : على محمد محمود أحمد الملاح
الشهرة : على الملاح
شعر عامية
قصيدة بعنوان….
(سُكر برة)
…………………
حَبة ظروف حَبت تشوف
سعة احتمالك قد أيه
قام لَ لما زاد ضرب الكفوف
روحت ل غريب تتحامَي فيه
أرضك يَجوز مش مُنصفة
والحمل أتقل مِ الجبال
وإن جيت تبيع لحم العيال
ما يجيبش حق التكلفة
وبَقيت بتشبه للحمام
بتلم قمحك والحبوب
من فوق تراب الأرصفة
ولما بيصيبك مرض
تعشم فِ طلة عزرائيل
أسهل ما تعشم فِ الشفا
ومش عاوز اذوق كلامي بتُرابها
ومين ذَم فيها ومين اللي عابها
وإن اللي هاجر دا كان حد فاجر
وسابها تعجز فِ زهرة شبابها
صحيح كان وجودك مُجرد كَهامش
وعايش كَميت وميت كَعايش
وحلمك تلاقي لرغيفك غَموس
كَحلم العوانس بسوق الغوايش
حقيقي البلد دى ماليها العيوب
فِ كل النواحي الشمال والجنوب
عشان تبني حلمك دا شبه المُحال
وهَيمُر عمرك بتجمع فِ طوب
ياضيف وسط ناسك دى ناسك ضيوف
ورضيوا المعيشة وقبلوا الظروف
ومش بس هُما اللي رضيوا وعاشوا
دا فى ألف غيرهم ويمكن ألوف
صاحبي قالي فِ يوم رحيلُه
أنه مش ناوى الرجوع
وإن من أدب الوداع
عينُه تبكي ولو دقيقة
بس مش لاقية الدموع
قالى تعرف ؟
أني حلمي فاضلُه ساعة
بس ويشوف النهار
قالي تعرف ؟
كُل شيء هَيكون بخير
لَما هَوصل للمطار
قالي تعرف ؟
قولت عارف ….
إنك أنت فُ يوم هَتعرف
إن تعبك وسط ناسك
لَجل تكسب كام جنيه
غير ما تخدم فِ الأجانب
لَجل تجمع ب الدولار
يافاكر غُربتك وَطنك
ورابط حبل على بطنك
وسيبت الغُربة بتجُرك
لَقيت فِ الغُربة أيه ياحزين ؟
مَفيش فِ الغُربة ولا تاجر
هَيقدر مهما تدفعلُه
يبيعلك فرحة ويسُرك
يادايق كُل شيء صبار
وكاره عيشتك المُرة
عزمت النية ع الرحلة
وفاكر سُكرك برة
صبحت بتشبه الألة
وظيفتك بس جمع فلوس
وجسمك كله زى تروس
و كل ما تنتهي لفة
يعيد اللفة والكرة
دخلت فِ لعبة الشطرنج
ودورك عسكري أعزل
وعايش فيها بالعافية
وكشيت مِ الملك حبة
وكشيت مِ الوزير حبة
وكشيت حتى مِ الطابية
كأنك ساعة شغالة
وعقرب فيها كان بايظ
ومر العمر بين أيدك
ما بين الصح والجايز
رميت روحك مابين ألغام
ومتحاوطة ب سور شايك
عشان تجمع شوية مال
جمعت الذُل فِ سبايك
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
