قصيدة : سمار الليل . مسابقة الشعر العامي بقلم / سعد السعيد

الاسم
سعد سعيد
الشهرة
سعد السعيد
فيس بوك نفس الاسم الشهرة
جمهورية مصر العربية
شعر عامية
موبايل + واتس
٠١٢٢٦٦٨٧٨٦٤

قصيدة
سمار الليل
………

وفى عيونها سمار الليل
ونني عيونها بيلالى
وشايف رمشها بيعزف
وصوت العشق بينادى
‏فى عين الشمس مرسومة
و ‏قمرها ع الجبين مرسوم
‏ولو تعلن عنيها الحرب
‏مصيرك فى الصراع محسوم
هويت منها يكون لى ميعاد
وشوق القلب كان مكشوف
غمزتلى بصوت الناى
على الود ليه ملهوف
القرب مش ساهل
وانا على الدلال واخدة
أنا مهرى كان بالدم
وكل النجوم شاهدة
أنا الحره و زيادة
وسر الحياة فيا
ومأصلة الانساب
والقلب والنية
رديت عليها وقولت
العشق سوانى
خايف يكون قلبى
عشقنى جنية
ردت بصوت مشدود
فى كمنجة العازف
الجن دول خدام
وفارقنى لوخايف
أنا طلبى فى العاشق
لازم يكون مجنون
ويكون أسير ليا
يرفعنى فوق الكون
رديت على عيونها
يابت ايه مالك
الكبر ليه واخدك
العظمة للخالق
قالتلى سبحانه
هو اللى صورنى
أبدع فى تكوينى
للمجد هيئنى
رسم فى قلبى الخير
مشاه فى شريانى
ورسمنى فى التفاصيل
مليش شبيه تانى
ومن حقى اتباهى
والتاج على راسي
ولا حد ليه عزوتى
ولاناسه كيف ناسي
اهلى الأصول والكرم
والطيبة جواهم
اطلب يجونى ألوف
يفدونى بدماهم
اهلى الجمال والحب
والمدح والمواويل
فى قلوبنا صوت الحق
فى عروقنا ماشي النيل
غير بس كام واحد
إبليس بيرعاهم
رغم انهم منى
الفكر غواهم
فرسمنى لحم رخيص
فى عقولهم الخالية
اتحدوو بالشياطين
والرك ع النية
رب العباد شايف
حارس على عباده
نجانى انا العصفور
من فخ صياده
وادينى اهو عايشه
وكرامتى فوق منى
وبرغم اوجاعى
عزالى حاسدنى
من حقهم طبعآ
شايفنى فوق الكون
شايفنى متصانة
ولا عمرى يوم راح اهون
والرمش لو يأمر
يفدينى ١٠٠مليون
يفدينى ١٠٠مليون