قصيدة : سماوي..مسابقة الشعر العامي بقلم / أحمد إبراهيم رياض

قلبي صحرا وانتي نظراتك مراوي
بُصي يمكن حتى ابيّت مرة راوي
بلهي نفسي واصوغ عيونك جوة صفحة
ف القى نفسي قلبت من شاعر لراوي
مدي جدرك جوة أرضي وشدي مني
وارمي جوة القلب من ثغرِك تقاوي

يا عظيمة كل قصة وكل سيرة
يا رفيقة درب من ضَلّ المسيرة
انتي أجمل حبة من ريحة الفانيليا
وانتي إيدك ع الجروح زي الجبيرة
وانتي اعظم من حضارة مصر ثُمَّ
انتي اكتر حد عايم في السريرة

يا سمايا ويا سماها ويا نجومنا
إيش يجيبكم يا حمامهم ويا بومنا!!
عيشنا نفطر ويا غيرهم طول حياتنا
واما جابهم ريح هوانا لدارنا؛ صومنا
يا هواهم عيشت تنقل من ريحتهم
ايه هيفرق لو توصّل ريح هدومنا؟!

يا حبيبتي العمر لو ليكي اتنازلك
يا حبيبتي البدر لو عاوزاه؛ نازلك
لو جموع الخلق ملّوكي بجهالة
كوني واثقة بإني جمبِك؛ مش هملّك
أوعي تفكيرك يجيبك تمشي عني
هقضي عمري قصاد شارعكم؛ مش هحلّك

غني ليا ولحني كل الغناوي
خلي عينك تصبُغ البُني لسماوي
مَلي شاعر جي يكتبلك قصيدة
حد شاعر حَق مش هجاص وهاوي
ياللي جرجرتي القصايد في الشوارع
لمي ريحتِك لو سمحتي من القهاوي!

غيمك الابيض محمل فيه مطرنا
كنا أشبه بالعرايا حد ما كفك سترنا
بعد ما صومنا في لقاكي سنين وجوعنا
غيبتي تاني وقومنا سمّينا وفطرنا
يا خليلة قلب ك الغيمة الفقيرة
لجل عينك قومنا م الفجر اتعصرنا

_أحمد إبراهيم رياض