سن القلم
……. ….. .. ..
مكسور يا سن القلم
ايه اللي صابك قول…….
حبرك خلاص اهو جف
ولا عادش فيها حلول
مين اللي كان السبب
أو مين عليه العتب
خلاك حزين مقهور
تاهت حروفي معاك
فانهارت الكلمات
وأتجمعوا الخيبات
على سنك المفتول .
تايه مابين القال
محتار وبختك مال
وانت اللي كنت زمان
استاذ في فن القول
مكسور يا سن القلم
وحدك حزين باكي
بتعاني ليه م الألم
وتملي ليه شاكي
كل الحروف حلفت ..
لتعاند المكتوب
حست بإنك ذنب
ولابد منه تتوب
ولا تنزفك مواعيد
ولاتكتبك تجاعيد
ولا تبكي يوم العيد
طب ليه يا سن القلم
صابك خرس مذموم
عذبتني وياك
والقلب كله هموم
وانت اللي كنت زمان ..
عن حالي بتعبر
وان جيت في مرة عليك
تعذر .. وبتقدر
تمحي الألم والنوح
وتداوي أي جروح
وأن مرة صابني الخرس ..
انت اللي كنت تبوح .
ح أبوح لمين بعديك
ويكون آمين ستار
بعدك مافيش أصحاب
يا كاتم الأسرار
ومين ح يبقى السند
وأنت الأمان للروح
قلمي أنا يا شقيق
مالك كده هلكان
إوعاك تسيبني غريق
ده أنا بيك وليك عطشان
امتى تعود يا قلم
وتبوحني ع الاوراق
نرجع أنا وأنت
ونلملم الاشواق
ولا نسيت أننا ..
كنا زمان عشاق .!!!
باستحلفك يا قلم
أرجوك مافيش داعي
أصبحت بعدك عدم
بتنز اوجاعي
بقيت بتفرح ليه
وبتلوي في دراعي ؟
وأنا عمري ما وجعتك
وحافظت ياما عليك
ولا عمرى أهملتك
ولا جيت في مره عليك
ماتقولي من فضلك ..
مين اللي يوم هجرك
مين اللي كان وياك
مين اللي كان ضدك ؟
ده أنا حرفي والله فداك
ولا حتي عندي خيار
أني في يوم أختار
إني ابيع روحك
أو حتى أخون بوحك
ماتقولي وتفضفض
سيبك من اللي خانوك
أحكي لي مين قساك
ع المر يوم غصبوك
كتبوا عليك الضنى
وأغتالوا أحلي مافيك
يا قلمي أرحمني ولملم الباقي
وأكتبني زي زمان
وأوصف في أشواقي
لملم سنين العمر
و داوي فيا الجرح
أجبر لي كسر الزمن
رجع سنين الفرح
رجعني نن عنيك
وابقى السمع والشوف
ومستحيل يا قلم
تبعدنا تاني ظروف
يرجع لنا شملنا ..
والنزف يبقي حروف …!!!
باكينام حمزة ……..
شاعرة عاميه
عضو اتحاد كتاب مصر .
القصيده لمسابقه مهرجان همسه لشعبه شعر العاميه
