قصيدة : شياطين الإنس .مسابقة الشعر العامي بقلم / رمضان عبد الحميد زيدان

ـــــــــ شياطين الانس ــــــــــــــ

مُفْتتح

.

زمان كانوا يقولوا علينا

“عاجنينا بميّة عفاريت”

وتمر سنين بعديها سنين

يختلف الانسان والتوقيت

تلقى العفاريت

معجونه بمية بنى آدمين

.ــــــــــــــــــــــــــــــــــــــــــــ

النص

الطيبه وحب الخير للناس العمله النادره ف أيامنا

عالم فاقدين معنى الاحساس الكدب اساس كل كلامنا

ووشوش ملبوسه تغطى وشوش

بتحوش اشكال أصلاً لوحوش

ماعادوش الناس كدا زى زمان

مابقوش يتعاملوا وش لـ وش

بقوا بيتلاقوا خلف شاشات

حتى الصداقات بين ناس كانوا زى الاخوات

يجتمعوا زى زمان لكن

(على غرفة شات)

نقعد لساعات نتكلم ويجينا الرد

بنتعامل مع شاشه وسماعه وكيبورد

مبقاش الشكل يطمّنى

الانسى بيشبه للجنى

وتملى بقا يعلق منى

(الشيفت ) ف لوحة المفاتيح

و(الإنتر) بقا يرفض ضغطى … لو حس بان كلامى صريح

والصاحب بقا يرفع ضغطى … بحاجات بيقول إنها تفاريح

خايف جداً م الزمن الجاى

نثبت علاقتنا ببعض ازاى

من غير وصلة نت وواى فاى

ومتابعة كل البوستات

واسلوب تزويق الكلمات

والتعليق المفعم بحاجات

ملهاش معنى جوا القواميس

ابليس……….. بقا يتعلّم مِنّا

يقعد مع اولاده الأباليس يحكيلهم عن كانوا وكنا

ووجود اصبح من غير معنى

وازاى اصبح فاشل جداً

من يوم ما مسكنا التدريس

شياطين الانس بتتميز

وبتاخد اعلى الدرجات

بالذات فى حوار الإشتغالات

مع إتقان لغة التهييس

اما شيطان الجن خلاص

مهزوم من حبة اشخاص

فى الماضى كان بيخوفهم

دلوقت صبح بيخاف منهم

بيخاف لا يجوله ف كوابيس

بقا يقرا الرقيه الشرعيه

ويتحصن بايات القرآن

لو قام عفريت م النوم مفزوع

بيقوم مسروع يسقيه ميّه

وينصحه علشان ما يكون ف أمان

قبل أمّا ينام يلزمله يقول

“أعوذ بالله من الانسان”

.

أعوذ بالله من الانسان

فى زمان اتبدلت الادوار

لا الصاحب بقا هو الصاحب

ولا جار حافظ لحقوق الجار

ولا فارقه الاخره فى حساباتنا

حبينا الدنيا وهى سابتنا

كيف ندعى المولى يثبتنا

وذنوبنا بنعملها باصرار

محناش على درجه من الايمان

برضك يعنى محناش كفار

تحتار فى قلوب بتلين منظر

اما الجوهر قسوة احجار

تعزف دايماً ..عن فعل الخير

ترفض دايما ..مصلحة الغير

ويادوب تعرف نقطة ضعفك

تبدأ بالعزف على الأوتار

أستار الظلم على المسرح

حجبت عننا أشياء حلوه

لو كان دا الظاهر قدامنا

فما بالك بذنوب الخلوه!!!

وعشان ما أكون مُنصِف لازم

ولابد اقول الخير موجود

فى زمان الشر بيتزاحم

يحشد له حشود لاجل ما ينهيه

انما سبحان ربى المعبود

بيسخَّر ناس تتمسك بيه