قصيدة : شيطان الشعر . للشاعرة / وفاء على

#شيطان_الشعر

كتبت الشعر من ألمي .. ومن ضعفي
ومن حيرتي .. ومن خوفي
لقيت الشعر قواني
وخد م الكل واداني
وحط المعنى فـ كفوفي
رسمت الصورة بمشاعري
وكل خيالي وحروفي
طلع لي الحرف يهمس لي
ويحلف لي
هتبقي أميرة للكلمة
وبكره تحسي وتشوفي
رميت همي في بحر غويط
سقيت الحرف بالتنقيط
زرعت الفكرة طرحت لي
غناوي كتير وشرحت لي
وتاج الشعر أهدت لي
بلا صراعات ولا تخبيط
نسجت المعنى ببراعة
بقيت لأوامره منصاعة
وشفت قلوب بتهدي لي
فروض الحب والطاعة
لكن جواها مش صافية
بكل مافيها خداعة
رميت ظني في بحر اللوم
وخاب ظنّي..
فغرقني ف وسط هموم
انا اللي تملّي غلطانة
عشان جاهلة بفن العوم
ولسه الشعر وشيطانه بيغويني
أصيد الفكرة والاقيها..
بكل جنونها ترميني
أجيب الورقة واكتبها ..
فينزف دمعها في عيني
كتبت الشعر وأنا كارهة
أكون شاردة
وارص كلام بدون احساس ..
ومشاعر تكون باردة
ف طوّعت الحروف غصبًا
وزيّنت القصيد رسمًا
بقيت القبلة للإحساس
ومات زيف الكلام عمدًا
راهنت العمر على لحظة
يكون شِعري حليف ليا
رميت للمعنى كام غمزة
وكتّرت الملاغية
نزلت ف بحره أتوضى
عقدت العزم والنية
يكون شِعري سلاح صاحي
ولا يصبحش تسلية
______________
وفاء علي