صوت مبحوح
*************
الليل بيبص من الشباك
علي ناس نايمين والباب مفتوح
وبيرمي عليهم كوم أشواك
والشوك بيسيب ف القلب جروح
وانا صوت مبحوح من كتر النوح
كان نفسي أبوح بالسر إياه
وأصرخ ميت آه
من قبل طلوع آخر أنفاس
الحلم إياه
وزوال الروح …………
ولكني بخاف من طوب وشقاف
ف إيدين الليل اللي ما بيحس
وتملي بعينه الصفره يبص
علي ناس نايمين والباب مفتوح
وفاكرها سطوح
يتمخطر فيها بدون أسباب
ويدوس بأقدامه علي الاحباب
ويصب عذاب اليأس ف كاس
يسقيه للناس
وعيون بتخاف من ظلم الليل
وبتهرب منه ف حضن النوم
علشان ما تروح لمكان مفتوح
بتطل عليه الشمس ساعات
وما فيهشه أهات ودموع وجروح
علشان مطروح لمكان مفتوح
وتقابل فيه
الفرح الساكن نن عينيه
وتحني ايديه
بالحلم الطارح بالأزهار
ونهار كان تايه وسط الليل
مستني الشمس تطل عليه
علشان مايبوح
بالسر الساكن ف الأركان
ويشيل اللبس
الفاصل بين اجمل حبيبين
ويفوح من بين احضانه سلام
وكلام متضفر بالاشواق
يهدي العشاق
ويطمن بيه كده روح الروح
*********************
رضا ابو الغيط
