عادى
“”””””””””””””؛
كل يوم ابدا حياتى
الصبح بدرى ..
بشكل عادى ..
بعد ما افطر ..
أنزل النادى الرياضى .
يسألونى ..
كيفُه يومك ..
أرد اقول ..
انه يعنى .. يعنى .. عادى
بعدها صحبة صحابى ..
مرّه نتقابل فى ندوه ..
ولاّ نتجمع فى غدوه
نشرب الشاى فى الحسين
ولاّ ناخد قهوه ع النيل
فى المعادى
قولنا إيه .. أو أيه حكينا
مش هاتفرق
المهم اليوم ده يخلص
يمكن اللى جاى أحلى
أتخنق من اى زحمه
والإشارة بقت تطول
لأ بجد ..
دى حاجه رخمه .
والمولات بقت مُمله
الخروج أصبح عذاب
يسألونى كيفُه يومك ..
اقول زهقت .
كل يوم زى اللى قبلهُ
كل يوم بيعدى .. عادى
واما زارتنا الكرونا
جوه بيوتنا قعدونا
بس حاسين باغتراب
يومى مش عايز يفوت
نفسى أمشى فى الشوارع
حتى لو فى زحمه موت
نفسى اشوف أهلى وصحابى
نفسى أفتح حتى بابى
نفسى أرتاح من شعورى
باغترابى
إنهارده عرفت قيمته
لما كان بيعدى عادى
عشنا مش حاسين فى نعمه
بس حسينا الساعه دى
والنهارده بقول يارب
تانى يرجع ….. يبقى عادى
فايزه الألفى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
