عارفه يا احلام
لما الاحلام تهرب منك وتروح لبعيد
وبيجي رمضان
ف تبصي وراه
املا ف العيد
وتلاقي العيد مابقاش موجود؟
.
.
طاب مثلا لما الشمس تغيب
وطلوعها ياخدله شهور وشهور
والسما ف اخرها تلاقي حدود
.
.
اهو دا اللي بيحصل ويايا
احداث ف خيالي ماتتحققش
زي اني احب
او اكمل قصه لنهايتها
ومايكونش ف اخر القصه فراق
.
.
مش عارفه اشتاق
ولا بحزن لما بغيب وامشي
هتحسي اكيد
باللي بقوله
.
.
عارفه يااحلام
كل الايام اللي بعيشها
تقريباً بيعيدوا الكاره
مضطره اعيش نفس الاحداث
نفس الاشخاص
من غير تغيير
ودا امر خطير
انا مش قده…
.
.
عارفه يااحلام
النوم بقي صعب علي الواحد
وكأن الراحه دي مش ليا
وعنيا ياعيني بقت باهته
ولونها العسلي مابقاش لامع
انا قلبي عنيد ليه مش سامع
كل المخلايق…
ليه خُلقي يضيق
وابقي بطولي…
بتنرفز من اتفهه اسباب
وبقول ياغياب
واخد بعضي ف بعضي واغادر
من غير تفسير
.
.
انا نفسي بجد ألاقي تغيير
.
.
لو جف البير م المايه ف يوم
وبدال المايه نلاقي الدم
لو بدل الغم نلاقي الفرح
لو شوفتي القلب بدون جراحات
لو نمت ف يوم وناقصني عياط
او لما ابطل يوم احباط
.
.
لما الحكايات تخلص م الكون
انا هعرف احب
وهبطل خوف
ويبطل قلبي يكون مكشوف
خذلانه يموت
او لما الحزن يكون مبسوط
انا هبقي تمام
.
.
عارفه يااحلام
انا هنسى العالم دلوقتي
وهحاول انام
.
.
ياسمين سليمان
