مش بالضرورة ننبسط ف البار
ولا بالضرورة يلمنا الجامع
وعشان نكون كلنا أحرار
واحد بيتكلم
والتانى يبقي منتبه…سامع
(داخلين ف بعض سلوك وعريانة
زحمة وزعيق وخيانة بأمانة)
السُكر مش عربدة
ولاطيش ولحظة جنون
السُكر يمكن الطريق للهدى
تأكيد بإن …مافي شئ مضمون
سكران وودنه أتملت قرآن
فايق وقلبه أتملا…وشايات
لو دوقت مرة طعم حضن حنان
تفضل تعيط ع اللي مر وفات
وساب ف روحك طعنة مغروزة
المازة ترمس فوقه… عيط لمون
دارى الوشوش دخان حشيش جوزة
(ف السُكر مافي أي شئ مضمون)
زى الحياه
والحب
والامتلاك
والحوجة والعوزة
البار حياة ….ترابيزة
قاعده خلف ترابيزة
وكراسي مرصوصة كإنها معزه
كاسات بتلمع زى ضوء العياط
كله بياخد خاطر التانى
(ضيعتى ف زحمة ألمى ياعزه)
مقتوله فلتت من عيار طايش
راحت تموت بطلقة التانى
مسنود علي كتف راديو قديم
صوت أسمهان….طاير مع الدخان
(إمتى حتعرف إمتى إنى بحبك إنت
إمتى إمتى إنت إنت إمتى حتعرف)
السكرانين بيصبروا روحهم
بيطيروا بره الكون بجوانحهم
وجوارحهم
الرقصة سخنه زى لفحة رغيف
بحر الحياة ماطرحش حد نضيف
بيوسخوك عشان ماتتساوا
بيلغوشوا علي صوتك المؤلم
عشان ماتفضل سهرة منصوبة
الكدب سيد…… الليلة
ويستخبي الكل ورا توهه
عباية سودا بتلم الجميع
الويسكى فايت تحت جيب القميص
بيقطع الشرايين بنصل السيف
بلاط البار أتملا نزيف
والترابيزات تاهت ورا الدخان
مش قلتلك
مش بالضرورة ننبسط ف البار
اللحم علي بعضه
والغش كار
اللي فقد أرضه
وعرضه
البنت قالت لأمها بذاكر
وأبوها قافل علي نفسه أوضة
هو…و المصحف
وأخوها اخر سيجاره فرط ولعها
مستنى تيجى من عرقها تسيب
تحت المخده
زهوة المصروف
الشيخ حط الزبيبه ف جيبه
وكله واخد بعضه علي عيبه
مين اللي فاكر
إمتى كان صادق!؟
وجاى منين
ورايح فين
وعاوز إيه
البار مجمع أسرى حرب الحياه
ومعدومين شجاعة الاعتراف
ومهزومين معركة تافهه
عن مين بطل علي مين
هما العبيد أبطال!؟
مش قلتلك
مش بالضرورة ننبسط ف البار
ولا بالضرورة يلمنا الجامع!!!!
(أصعب خيانة النوم مع الأعداء
وإدعاء الشرف ف البار
عمر الخيانه ما تتقلب لوفاء
وعمر العبيد مايبقوا يوم أحرار)
