قصيدة : عجيبة الدنيا التامنة . مسابقة الشعر العامي بقلم / حسام حسن الطنوبي

حسام حسن الطنوبي
جمهورية مصر العربية
01123906102
https://www.facebook.com/profile.php?id=100006497230139&mibextid=ZbWKwL

بعنوان ( عجيبة الدنيا التامنة )
…..
في نص هدومي
مش عارف اقولك ايه!

وانا شاعر..
بسجّد ع السطور الحرف
في عيني الدنيا منكوشة
بقلبي الدنيا مفروشة..
ملايه عليها منقوشة..
حروف أسامينا من ع الطرف

فيه رعشة في ايدي مش م البرد..
لأ؛ من كتر حسن السرد
لانك لما بكتبلك..
بتسرق روحي أوراقي
أخلص..؛ ابص..؛ فبلاقي..
منبّت ع السطور الورد

كتبت كتير عن الأزمات..
وع الثورات
وعن قيمة رغيف العيش
وعن تجربتي جوه الجيش
وعن ملاطيش مقابل عمرنا بنقبضها لجل نعيش
وعن بذرة أمل طينّا
وعن نكبة فلسطينّا
وعن سوريا، وعن لبنان، وع السودان
وعن أجيال مخدتش الشلن م البوك
بترضع خبرة م الفيسبوك
تخوض تجاربها ع التيك توك
وشاطرة تشُك في الأديان

كتبت كتير عن الماضي..
بعين الحاضر السادي
كلام جوايا كان بركان..
ظهر فوق الورق هادي
عن السينما
اللي كات راقية..واغاني عننا حاكية
وشاي الزردة ع الراكية
ولُنَض الجاز على الباكية
وحصص الرسم في اعدادي

كتبت من الحياة رزقي
وسايب في القلوب لزقي
وريقي في الودان يسقي..
أراضي/ لكني مش راضي

ملامحك ناحته وجداني
كلامك راديو في وداني
ناقصني كشاعر ايه تاني..
عشان اكتب قصيدة حب..
تليق بيكي وميزاني يطب

كأني على الورق بتكَبّ..
ولسه قصيدة ولداني!!

كناري وعاجز انه يغني..
تغريدة
كأنك أو لأنك معجزة فريدة..
في نص هدومي مش عارف اقولك ايه!
عجايب الدنيا سبعة ودي..
عجيبة في الحياة جديدة
نشوف شاعر عاوز يكتب..
قصيدة شعر في “قصيدة