قصيدة : عدسات بتشوف أكتر من لون بقلم / محمد أحمد خليفة . مسابقة الشعر العامى .مهرجان همسة التاسع

***********************

وهبت نفسي للحقيقة عشان
نفسي أحس بإن انا موجود
عذبت عيني بالنظر عميت
فتحت قلبي شفت كل وجود
جوا الصور جوا الكتب جوا التاريخ
وعرفت طعم الوحده والخوف والصريخ
وقسمت نفسي اتنين مافيش بينهم شبه
لكن بيجمعهم سوا حب الوطن
كلمة وطن مش سهل تنزل عالقلوب كلمة وخلاص
الوطن يعني البلد من غير رصاص
أو ورد نَبِّت في الجناين بعد تأثير القنابل
أو ريح محبَّة جاية من طين أرض بابل
الوطن هو الدفا والانتماء
هو اللي بيصبرنا على وقع البلاء
لعب السمك عالمية بعد الضهر
قطفة بنات القطن في رقص العصاري
ريحة النفس لو عدي في غيطان القرنفل
أو صوت حبيبتي لما بتقول لي بحبك

مش شرط يعني تبقي شاعر أو نبي
علشان تشوف ايه اللي غير مذهبي
خلاني اشوف كلمة وطن بنت بضفيرة
وأشوفني بعد سنين شقا بارجع صبي

الفرق بس ان اللي حس بإنه شاعر
فطرته بتخلي كل الدنيا حواليه ملهمة

مثلا :

صوت صفارات الغارة في طلوع النهار :
عصافير بتنده عالغنا يفرد جناحه

شكل البنادق لما تتعمر : حبة عيال بيجهزوا للعب

شكل الطُلَق وقت الخروج طايشة :
أسراب حمام اتفرقت حين مات قائدهم

مثلا :

بطل في السينما وقت ما شاف حبيبته
النور قطع..
قام مد إيده في السما جاب نجم نوره مانتهاش

الخوف : اهو دا بقى أكبر حقيقة نحسها ماتحسناش

كل الحاجات المدهشة اللي انتوا مش شايفينها دي
بتجيب أجل بير الخيال اللي بناكل منه عيش

طب ليه بتكتب ؟
عايز اعيش
ممكن تموت ؟
لازم أعيش
الموت وانا خايف كدا مايحقليش ..

محتاج أعافر ..
ابعد سنين عن نفسي حتى ولو هسافر
ارجع ونجمي في السما بيلمع قصادي
مش هابقى عادي..
زي اما جيت الدنيا متشال عالإيدين
هخرج وانا سايب أثر فوق الكتاف
مش هاعترف بالجبن تاني لأي خوف
حدوة رجولي هتتتنحل م الجري فوق سطح الظروف
لكن هاشوف لو حتى متر في متر نور استقوى بيه
وهيبقى اكبر انجازاتي في الحياة مهما نسيت صوت الهتاف
بطلت اخاف
بطلت اخاف
بطلت اخاف ..

********************

محمد أحمد خليفة / مصر
01211799719
[email protected]