عريس النصر
******************
فرحي قرب
والعريس لسه ماجاش
لسه واقف ع الحدود
يحمي امه
من كلاب ما يهمهاش
غير تدمر أو تخرب
مجد أمة ف قلبه عاش
لسه واقف يحمي ارضه
لسه صاين.. طهر عرضه
العريس …حالف ليكتب
اسم امه …..اليوم بدمه
فوق ترابها
مش علي.. حتة قماش
عشتي يا امه حاضنه أمة
عاش عريس النصر عاش
★ ★ ★ ★
بكره اول يوم دراسة
والبطل واقف حراسة
يحمي امه م الديابه
وسط غابة م النجاسة
كان منايا يبقي جنبي
اللي ساكن جوه قلبي
بس لجل عيون بلادي
واللي مظلوم م الغلابة
مصر أولي.. اليوم ببابا
اللى حالف تبقى روحه
ملك إيد الغاليه أمه
كلمه قالها نبض قلبه
والكلام مافهوش نقاش
عشتي ياامه حاضنه أمة
عاش عريس النصر عاش
★ ★ ★ ★
ابني سافر من يومين
ويا كل المخلصين
لجل ما يطهر بلاده
م العصابة الغدارين
ابني عكازي ف حياتي
واللي هيشلني ف مماتي
يوم ماسافر
قال لي يا با
مصر أمى محتجاني
وان نادانى رمل سينا
تبقى سينا أولي بيا
قال لي يا با ..
قول لأهلى والغلابة
تدعى م القلب بطيابة
تبقي جنة ربي ليا
د اللى بينول الشهادة
جوه قلب الكل عاش
عشتي ياامه حاضنه أمة
عاش عريس النصر عاش
★ ★ ★ ★
ابن بطني ..نور عينينا
يوم ما سافر
قال لي يا امه
فى صلاتك ادعي لينا
وادعى للأمة الأبية
تبقى فوق ضَهر السفينة
قلت يا ابني ليه تغامر
وانت حُضنك بيداوينا
قال لي يا امه
نفسي احارب
كل واحد بيعادينا
نفسي يرجع حضن بلدى
كل شبر ف أرض سينا
لجل ابنى وابن ابنى
يلقى زاده والمعاش
عشتي ياامه حاضنه أمة
عاش عريس النصر عاش
★ ★ ★ ★ ★ ★ ★ ★
رضا أبو الغيط
