انا لما باكتب لبلدي مش باقول غير حق
وصوتي يعلى تموت تعابينها جوه الشق
ولما باسهر على على الترعه باكون مبسوط
ولما بابعد الاقي قلبي حن ورق
يامصر يامُعجزه …. ياشبه ومعجِزه …. انتي الدوا للداء
ياطاقه الانوار …. يابير ملان أسرار …. يا أم للشهداء
مكتوب على بابك …. إنك لأحبابك …. والغدر ما له مكان
آن الأوان يامصر … نرفع رايات النصر .. وندوس على الأعداء
لمي العيال لمي .. داوي جراح همي .. وامحي دموع عيني
قيدي قناديلك .. على ضفتين نيلك .. وبايدك ارويني
انا يابلد عطشان .. نفسي في حضن أمان .. فأمانه ضميني
وخديني من نفسي .. انا يا بلد نفسي .. في أمانك احميني
الكون ملان تعابين .. والبُعدا مش حاسين .. ان الكلاب ع الباب
قاعدين بيتشدقوا .. وعليكي يتريقوا .. ويعددوا الأسباب
وانتي اللي شايله كتير .. جهل وضلام تكفير .. وضلال وسيف إرهاب
يامصر صحيهم .. قومي ازرعي فيهم .. بزره من الأحباب
سيفك في ايد جيشك .. قومي اخبزي عيشك .. ولا تخافيش النار
جيشك ملان شجعان ..ولا خونه ولا إخوان راح يسكنوا في الدار
اسود على أرضك . بيخافوا على عرضك .. ويكملوا المشوار
الرايه مرفوعه .. والكلمه مسموعه .. وخلاص اخدنا قرار
هنموت ونحميكي .. وبروحنا نفديكي .. وتعيشي يابلادي
وهنبني ونعمر .. وسلاحنا متعمر .. جاهزين ودا العادي
لو اموت راح ابقى شهيد .. يابلدي دا يوم عيد .. ويكملوا ولادي
وتعيشي منصوره .. وزاهيه في الصوره .. وتحكي امجادي
انا في الغيطان فلاح .. وانا شادوف وسلاح .. وفي الميدان فارس
وانا اللي بافديكي ..وانا اللي باحميكي .. وطفل في مدارس
وانا اللي مش خايف .. وبقلبي أنا شايف .. وباحاول ارضيكي
أنا شهيد الحرب .. وانا اللي فك الكرب .. وانا اللي عاش حارس
وهاموت فدى عيونك … وتعيشي يابلادي
