قصيدة : عقوق . مسابقة الشعر العامي بقلم / أحمد التبيني

بنيت أدوار كتير

وقُلت أنا بانى..

وقُلت فَرح الغير

دا أغلى بنيانى..

وكل دور أبنيه

أحلم فى يوم ألاقيه

سكنى..ويرعانى..

وقُلت أحصد بقى

تعب السنين وارتاح

فكرت عيشتى أخضوضرت

وان اللى جى براح..

والدنيا رح تبتسم

وتضمنى الأفراح..

أتارى كل البُنا

مليان شقوق مايل

بدل ماأربى الولد

جه هو رباني!

كل أما يعمل غلط

أفتكره وأنسانى..

واديه حنان قلبى

وأفضل أرمم فيه

وأجيب أخوه يراعيه

وأقول له عملك شاق

خلى جدارك متين

خليك لأخوك ترياق

بهتوا الحيطان على بعض

بقى عاق بيحضن عاق

ودور وِقع على دور

ونزلت م العالى

لاعرفت عيب الحيط

وللا من البانى؟!!!!!!!