قصيدة : على فيض الكريم .مسابقة الشعر العامى بقلم / صابر فرج ياسين

أيوة من قلبك خرجت .. وقلبي ماشي مش سليم

زي زرع وجف عُودهُ .. ولسّة مسّتني النسيم

والندى خاصم خدودهُ وخد معاه نور الصباح

ضاق عليا الكون بحاله .. وكنت جُواكى ف براح

بشتكي ف البُعد منك . من حنين سابني وراح

و زي ما دخلت ف حياتك قلبي طمعان ف الحنين

ماشي مِنك .. وصْلي خالي .. وقلبي على فيض الكريم ……

بس شوفي ..

أنا حروفي عدت الخوف العظيم

وفى الحَرّمْ أشواقي طافت ويّا حُجاج الكريم

يسألوه من رحمتهُ لو إنتي فعلاً نعمتهُ

يُوهبني إياكي وراح اسجد .. شكر دامت رحمتهُ

وإني كنت عبده الكفيف وحِلمي نور الضلمة ضيْ

يا اللي زيك يوم مشفتش . لأ مشفتش ليكي زي

أنعم الرحمن برحمة . نورت لِيلي العتيم

فتح الأعمى بأول ” كُن ” . فارتوى القلب السقيم …..

وبسألك . قبل تهدي الجدار .. وبغرابة وفى ثبات

إيه هايجرىٓ لمّا أمشي من سُكات ؟

هيبقى مش فارق معاكي . يحيا قلبي ولا مات

ولاَّ يمكن تِبكي حَبّه .. أو يبان الفرق حَبه .

يلاَّ ثُوري .. وإعلني قيام المحبة

ترجع الروح للبراح . وإعلني رجوع اللي راح

وأدخل الباب إللي أخرهُ .. حُضنك الدافي الرحيم

أو بإعلاني بخروجي .. وصّلي خالي .. وقلبي على فيض الكريم