الاسم / محمد عنتر محمد
الدوله / مصر
المحافظه / اسيوط – مركز القوصية
رقم الهاتف / 01277719703
اسم اكونت الفيس / محمد القوصي
نوع الفن المقدم / شعر عامي
قصيدة بعنوان ( عيل عجوز )
………………..
قالوا شاعر * والكلام عبد لهيامك
والحروف لعنيك بتركع من مفيش
قالوا ساحر * والعصا عضمة لسانك
لو رميتها علي المسامع تقلب الإحساس لجيش
قالوا حاكم * واللغة قدام جلالة عرش فكرك
لابسه خيش
قالوا عالم * والسكوت جواك بيرضع
معني فبيبقاله ريش
قالوا في الاخر مفيش كلمة للست اللي ربت
رد عجزي وقال. مفيش
ومين هو الكلام ياما
عشان يوصف تراب قدمك
ومين هيا القصيدة عشان
تكون لو فرد من خدمك
ومين راح اكون عشان اقدر ألم الكون
ف عقد يضيئ علي جيدك
وفين هيا المعاني عشان اجيبهالك تبوس إيدك
أنا اسف علي عجزي بموت كالعادة يوم عيدك
وانا صغير كانت كل عيال الشارع تنزل
فرحانه بفتح الحصالة يجروا علي الدكاكين
وينقوا من الفتارين ويكتبوا رسالة
امي كل سنة وانتي انا والضلوع الساكنه فيا
امي كل عيد وانتي اغلي م الوريد
واغلي من عطشي لماية
امي كل عام وانتي المقااااام
اللي مبني قصاد عنيا
اللي يجيب ورد وازهار
واللي يجيب طرحه وجلبيه
واللي يجيب مصحف وخمار
واللي يجيب ف إيدة مصلية
كل اللي بيطلع من داره
كان لازم يرجع بهدية
وانا واقف بتفرج ديما والدمع بيدفن رجليه
كنت ارجع اخر الليل مكسور تفهم فاتسبلي العشا وتنام
اثبت علي بابها واتردد ف سكوت وكلام
ادخل اتأسف ولا ارجع طب اقولها ايه
مقدرتش اجبلك ياماما تفرحي زييهم
معلش المره الجايه هجيب
وكإنها حاسه وسمعاني وحنانها يسرسب في كياني
وطبطب روحها علي احزاني
انعس قدام الاوضة وانام
ودموعي تسيل تجري عليها تلمسها في لحظة تصحيها
وانا نايم مش حاسس بيها حاسس بغياب
اصحي القاني علي دراعها والصبح علينا بيتفرج
ف من خرم الباب
ابرد فعنيها تغطيني وضلوعها تلملم ف سنيني
واشكيلها عذاب
إمبارح كنت عجوز ياما غير الاصحاب
كنت ببهت في الهدوم كنت حاسس بإحتلال
كنت بتكسر واقوم بين عيون كل العيال
تحضني تنسيني امبارح
وتنقي من القلب الطارح ليا الافراح
الشمس تغير من الحنيه فتنام علي حجرها زييا
وتنسي المرواح
امي حجرها كان وطن لو سبته يوم اصبح غريب
والقلب من غيرها عطن لو حتي فيه مليون حبيب
امي صبرها كان نبي صبرت علي دود الخلايق
عاشت تحقق مطلبي وتحلي في اليوم اللي حايق
امي اللي خبزت من عجين القلب قرصة
لما حست يوم بجوعي
واما شوفت الجوع بياكل من جسدها
لقيتها قارصة علي قلبها مش عاوزة بس تشوف دموعي
فتحتلي حضنها مدرسة يوم ماترفدت عشان رسوم
ضحكت ساعتها من الأسي وادتني درس بألف يوم
خلعت عمود من ضلعها علشان تنورلي
دقت عنيها ع الحطان سبورة لعلامي
حفرت طرمبه ف ننها اعطش تدورلي
اتعب ياناس معرفش كيف تسرق آلامي
كنت ضل ف ضلها وفي منامها ادخل وانام
كنت شوفها اللي فاضلها كنت ف لسانها الكلام
امي كانت لما تصحي تصحي وياها الحياة
وبدموعها توضي بيتنا قبل متقيم الصلاة
اجري واثبت جنب منها روحي يغسلها الإلاه
علمتني ف بيتي اغمس لقمتي من وسط جوعي
علملتني اضحك واطلع ضحكتي من بين دموعي
علمتني يوم طفولتي يعني اية كلمه عجوز
وإن اغلاها الرخيص وإن ارخصها الكنوز
لسة مش ناسي اللي فات
لسة فاكر الحكاوي والغناوي والسكات
والغنية اللي كانت بتدايقني بالساعات
البنات البنات الطف الكائنات
كنت اعيط وتحايلني كنت ازيد علشان تشيلني
كنت ازغزغها تبادلني من خدوها الضحكايات
لما زاد عمري شوية الظروف كانت قوية
هم شافت مر شافت امي م العزة اللي فيها
كانت تبات وعشاها ماية
قولت اسافر لجل اعوضها السنين
باعت الحلق اللي حيلة ودنها وطشت العجين
باعت النور النظر وكملتلي حق تذكرة السفر
يوم ماشلت الشنطه كانت دمعها نازل شرار
سبتها في البيت لقيت قلبها عند المطار
شوفت انوارها في شنطتي مداريه
شوفت ضلها كان مخيط ف الطقية
شوفت روحها داخلة من جوة الكوفية
الدموع وسط الخلايق وقتها شقت عنيا
كنت فاكر لما هرجع هلقي ف وشوشها الصبية
شعرها لساه بلونة زي ضي المغربية
جلدها لساه مدابش
لما شوفتها قلبي لف علية كلبش
اااه ياغربة احساسا دبش
قومي يا اما احضنيني حلي عني قيد سنيني
وبدموعك طهريني ونشفيني بالحنان
ليه حطانا ياما مش اربع حطان
ليه سريرك دمعه واصل للجيران
ليه صراخك كانو عني بيداروه
يالا قومي عشان حبيبك النبي مش عاوز اتوه
شوفي قلبي جايبلك ايه خمارك اللي شوفته زمان
ومقدرتش اجيبهولك جايبلك اخوة
ملعون ابو المال اللي خدني من شبابك
ملعون ابو البعد اللي خلي ف الهدوم يكتر عذابك
ملعون ابو الكبر اللي صابني واللي صابك
بعت عمري للغريب وانتي معملتش حسابك
بس والله غصب عني لما سبت عنيكي ياما
ضاقت الدنيا الوسيعه زاد علي وجعي الوجيعه
عيني مبقاش فيا ضي البعاد عنك يا امي
دود بياكل جسم حي
