قصيدة : غير كل البشر .مسابقة الشعر العامي بقلم / أحمد البكري

/ احمد بكرى محمود أحمد.
والشهرة ، احمد البكرى.
هاتف / 01155093718
من محافظة أسيوط. ومشاركتى قصيدة عامية .بعنوان
(غير كل البشر)
اللى باع حبى وسايب
قلبى فى حالة انهيار
اشتريته وهو غايب
رد لى الجنة بنار
هان عليه عشرة سنين
والوعود كانت كلام
بان عليه ضعف الحنين
وابتدأ منه الخصام
مش هموت بعدك بجد
بس صعب عليا إنك
كنت حاسك روح ونبض
والجراح دى تيجي منك
لسه عايش لسه قادر
انتصر على كل اه
لو حبيب باعنى وسافر
لسه بعشق الحياه
ياما بتحمل وراضى
ياما قلبى شاف اهات
كنت بظهر إنى عادى
واستخبا فى السُكات
ألف مرة تدارى عينى
الدموع وما شفتهاش
ألف مرة بنار كوينى
روح خلاص مابدهاش
مش هخبى عليك قرارى
وهعلن النبأ الاخير
قلبى مش راضى بنارى
قلبى من غيرك بخير
روحى مش محتاجة روحك
روحى محتاجة لحنان
شوف بقا فى الدنيا روحك
مين يحسسها بأمان ؟!
لو تنادى مش هتسمع
منّى غير كلمة وداع
لو تقرب مش هينفع
يرجع الحب اللى ضاع
كنت ملكك كنت قلبك
روحى كانت بين اديك
بس يا خسارة بِعندك
ضاع غرام منك وبيك
كل ما اجى عشان أصلّح
فيك حاجات القاك كسرنى
حتى لمّا بكون هوضّح
صورة رافض ليه تحاورنى؟
كل ما فمرة بقرب
خطوة ليك منى بتبعد
كل مرة وصعب اجرب
قلبى وانت فيه بتجلد
بُعدى عنك مش قسية
منى أو رد اعتبار
بٌعدى كان رحمة لعنيا
وروحى من كاس المرار
عمرى ما ظلمتك وربى
عالم اللى فقلبى ليك
دبت فيك ود كل ذنبى
كل ذنبى دبت فيك
بعد منّى شوف بعينك
مين يمدلك ايديه
بعدى روح الله يعينك
ع اللى هتحس انت بيه
لو لقيت انسان يصونك
لو لقيت فى سماك قمر
مستحيل وانت بجنونك
حاجة غير كل البشر
——————————-
أحمد البكرى