قصيدة : فات الميعاد . مسابقة الشعر العامي بقلم / رضا أبو الغيط

خاص بمسابقة شعر العامية.
الاسم رضا عبدالمنعم حسين أبو الغيط وشهرته رضا أبو الغيط
جمهورية مصر العربية
تليفون وواتس ٠١١١٠٦٣٠٢٤١
فات الميعاد
***********
من فوق سطوح بيتنا القديم
جنب الحمام اللي احتمى
بعشة فراخ
مافيهاش ديوك غير ديك يتيم
متداري من قطر المطر
ظُلم البشر
برد المناخ
تحت الجدار اللى اشتكى فصل الشتا
لأمى وأبويا وعمتى والخال سليم
واقف بغني للهوى مع صوت حليم
وبطوح الشوق والحصى لأبعد مكان
وبقول زمان
كان فيه أمان
وطريق على بحر الأمل
واصل مابين
حلم السنين وسنين بتطرح للقلوب
حب وحنان
راح فين زمان ؟
راح فين زمان الأمنيات الطيبة
تحت النخيل ؟
وأحمد وحسنة ومصطفى
والخال جميل ؟
راح فين كمان مكن الطحين
وماجور بيحلم يرتمى ف حضنه العجين
والفرن لما بيحتفل بأم اسماعيل؟
ليلة ما باتت عندنا تعمل فطير
للشيخ حسين
علشان يحفظ ابنها سورة يس
فين خلتي لٍندا وبنتها والواد نجيب
والتعريفات المنعشة ف كيس ام ديب
وجيران بلدنا الطيبين ؟
فين عمي سامبو وشنطته قبل العيدين
وجمال غويشه المغرمة
تسعد قلوب المطحونين ؟
راح فين فطار الفلاحين جنب السواقي والطيور
وزهور بترسم حسنها فوق الخدود
وعيون قلوب الشقيانين ؟
فين قطن غيط حوض الكبيرة والرزين ؟
يكسى العيال والمرتبة
ويسر عين قلب الحريم
مش لاقى ليه لعب العيال تحت القمر
وكسوف بناتنا الطيبة ؟
مش لاقى ليه صوت البلابل ع الشجر
والفرحة ف عيون الرجال ع المصطبة ؟
لما يهل بطلته شهر الصيام
وأما يقول
عمى محمه بطبلتة هل الهلال يا موحدين
راح فين حنين بابنا الخشب
للنقرزة ساعة السحور
من عمنا ( الشيخ عوض ) ؟
راح فين هلال
وهو قاعد يتفق مع قُلته ؟
ويقولها :
آن الأوان
نعمل معاهدة ع الخصام حتى الفطار
والمولي شاهد ع اللى صام
شهره الكريم
راح فين كريم
أبو قلب أطهر م الندا ؟
وسليم وتلجه المعتبر ساعة الغدا
لولاد بلدنا المرصوصين
على راس غيطان عزبة لياس
زي الجنود ف المعركة ؟
وأبو حنفي واقف بالعصا
يلسع كتاف كل اللى كسل أو عصى
يقطع رقاب كدوة حشيش متمكنة
من جدر فول نفسه يفوق
ويفوت ظلام المصطبة لنور السما
ويقول يارب
احمى الولاد
من شمس بتطوف البلاد طول السنة
واجعلنى خير للفلاحين
ولكل طير كان بات حزين
مش لاقي قلب يحس بيه
ف زمان عقيم
وف لحظة فاق عقلي اللى تاه
ف الذكريات وايام زمان
على صوت مذيع صوت العرب
بيقول لعمي الشيخ أمل
هنسمعك .. ( فات الميعاد )قصيدة