فاكرك يامه
…
فاكرك يا مّه ومش ناسيكى
لو قولت جنه يعنى أعنيكى
وهيا الرحمه بتنزل إلا بيكى
نفسى أقبّل رجلك وإيديكى
…
فاكرك أنا أقدر برضه أنساكى
دا انا حِته منك ومن حشاكى
هو يا مّه وصانى ولا وصاكى
خالقك رحمه وازاى يوصيكى
…
فاكرك يا ست الكل يا غاليه
وسيرتك بالبركه عليّا ماليه
وبدونها تبقى حياتى خاليه
دا كل شيء حلو كان فيكى
…
أنسى ضمة صدرك الحنون
ولا عطفك اللى بالـود مكنون
ولاقعادك ساعات عند الكانون
ولانار الفرن اللى كانت بتشويكى
…
فاكرك وفاكر أى دعوه كانت ليكى
وكل حكايه حكتيها من حكاويكى
ولا الدخانه اللى كانت حتعميكى
بتدفينا والبرد فى صدرك يعييكى
…
فاكرك مش ناسيكى يام الشهيد
والله الكون بحاله قصادك زهيد
فاكر الضحكه والبسمه والتنهيد
رحمه وجنه وبركه كلها أساميكى
…
فاكر كل لحظه كنتى فيها معايه
ولا سهر طول الليل وتعب الرعايه
وانتى بتدعى تقولى يارب إقبل دعايه
ولما أخف الدنيا كلها بترقص حواليكى
…
فاكرك وبداعكي يا مّه محروس
وحبك فى القلب جوه مغروس
فضلك علينا يا غاليه فوق الروس
لو نطول بأرواحنا يامه نفديكى
…
فاكر همسك وكلامك وسكوتك
وزادت غلاوتك يا مه بعد موتك
تصدقى لسه فى ودانى صوتك
ولما بتعب كإنك جنبى بناديكى
…
ولا لما كنتي بتخبي عني دموعك
بتتبسميلي والوجع بيقطع ضلوعك
وفاكر شقاكي وعياكي وتعبك وجوعك
مهما قلت في حقك مش حقدر أطريكي
…
طب سمعتى عاشق كره عشيقته
ولا شيخ فى بلدنا نسى طريقته
يا مه انتى أصل العشق وحقيقته
وكل كلام الكون مش حيوفيكى
…
إنتى يامه معايا لامس حضورك
وحاسس بروحك ودايما بشورك
تكونيش فاكره نسيتك لما بزورك
والله يا مه علشان بس أرضيكى
…
فاكر رحايتك وخبيزك وعجينك
والعرق اللى كان بينزل على جبينك
عمرك ماحسستينا بإننا تاعبينك
حتى لما كنا فى أشد متاعب بنوديكى
…
طب أقولك عشان يامه تنبسطى
من يوم موتك يا مه اتهد وسطى
كل ما تزيد همومى ويعلى قسطى
بتنفك كل كربى بفضل دعاويكى
…
قلب حبك مستحيل يكون قاسى
وعمره ما حيكون لأفضالك ناسى
حبك نابع من وجدانى وإحساسى
وتعبك فينا ربنا برحمته يجازيكى
…
رمضان يوسف الشيخي
الغردقة
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
