فاكره لما..
شعر عامية بقلم / طارق العجمي
الزقازيق – محافظة الشرقية – مصر
01000268623
للمشاركة في مسابقة همسة الآداب والفنون 2024 https://www.facebook.com/shaerarab?mibextid=ZbWKwL
….
فاكره لما .. كنتي طفلة
وكنتي تيجي عند بيتنا
كنت ازعق فيكي واشتم
يللا غوري من حارتنا
كنت تبكي..
وكنتي تمشي
وبعد حبه بــ تيجي تاني
يللا نلعب يابن عمي
يللا غوري انشالله تعمي
وانتي شايفاني تهاني
كنت تبكي وبرضه تمشي
واحلى حاجة انك بتنسي
بعد حبه بــ تيجي تاني
كنت احس فـ نن عينك
دمع خايف من أسايا
والعرق من فوق جبينك
فضى خوفه في العبايه
قولت احن عليكي وانسى
اني بشتم واني بقسى
يللا روحي واستخبي
او تعالي انتي استغمي
واطلع اجري ع المكان
الي اتولد فيه التمني
وابتدى فيه المسمى
فاكره لما.. شوفتي عيني
لما جيتي تمسكيني
وكات اديكي مرعوشين
و الرجول ملخومه تمشي
ولا تفضل مغروزين
و الرموش واقفين مكانهم
زي ميت من سنين
او ف يوم البعث قايمه
شايفه جنه ومبسوطين
ابتسمت أنا يومها فاكر
كنت أول مره احبك
بس كنت اسكت واكابر
قلبي يومها مكانش فاهم
إن دي بداية المشاعر
كنت أقول ده شعور قرابه
أو خيابه أو طيابه
كنت اخبي كتير و اداري
وكنا نلعب م العصاري
لما تبقى الدنيا ضلمه
لما قلبي خلاص غواكي
واما تيجي صحابنا تلعب
كنت انا بلعب معاكي
وان لقيتك مره غبتي
كنت احس بطعم غيرتي
فاكره لما… يوم كبرتي
واتخطبتي وروحتي جامعة
كنت اشوفك افضل ابكي
كنت انزل ألف دمعة
فجأة دقت فيا غيره
زي ما يكون سيف شاققني
كنت حاسس…
زي ماتكوني حبيبتي.. وروحتي مني.
كنت بمشي جمب دارك
لجل اشوفك حتى صدفه
واما طل ف يوم نهارك
قولتي أهلا يابن عمي
كنت ملهوف غصب عني
قولت أهلا يا حبببتي
فاتفاجأتي.. م المسمى
واتلفتتي وقولتي يامه.
فاكرة لما…
كنت بشتم فيكي واضرب
لما تيجي عند دارنا
لفت الأيام وجيتلك
فاشتميني ان كنتي رايده
اضربيني ان كنت قادرة
لو علمت الغيب ساعتها
كنت قولت لـ ابوكي بابا
وكنت جيت وياكي جامعة
أصلي جاهل كل حاجة
كنت فاكر بس إننا
ابن عم وبنت عمه.
انتي أول واحده كانت لما بلمس
كف إيدها تجلي حزني بنعومتها
وانتي اول واحده كانت لما اشوفها
كل وحش ف قلبي كان بيموت ساعتها
قلبي حبك من ورايا
بعد مانتهت الحكاية
فاكرة لما… جيت ف عرسك
واما شوفتيني اتكسفتي
واما جيت قربت منك
قمتي فجأة واتلهفتي
قولتي اهلا يا حبيبي
ماتفاجأتش م المسمى
ومتدارتش وقولت ياما
قولت اهلا بنت عمي.
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
