من غير مَـ اَهلِّل للعيون السود
واناجي طيفها وهِيَّ فاقدة وجود
أو حتى أشعِر فْـ الوجود وحدي
الشِّعر مَيِّت لو مَـ لوش مردود
الفكرة هِيَّ
والدماغ ملكوت-
ورغم وِسْعُه
-بيها ضيَّق موت
سايقة القوافي تبني فيا بيوت
سايق خيالي فْـ البيوت بيفوت
مين اللي فينا بيكتب التاني
وقت اَمَّا يطلع مِـ البيوت الصوت
الحب كلمة سهل ننطقها
سِكِّتها واعرة وطوق وتكبيلة
يعشم قَلِيِل الحيل يمَنطقها
تجري الحياة والعمر تغفيلة
هِيَّ وانا
اتنين ماليهم شوق
أسْكَر حنانها من حناني تفوق
سايقة فْـ دَلالها وقلبي مش حِملُه
كان بين ضلوعي
الوقت بقى مسروق
فايت سؤال بيشتهي للحل
ازاي ميزان الحب فجأة اختل؟
السِّكة ضلمة بـ إيه يفيد الشوف؟
مخنوق بتوهتي خنقة المحتل
هِيَّ وانا
وِشِّين بدون أقنعة
كان اِتفاقنا مَـ يمسهمش نفاق
وِسْط الوشوش
ملامحنا مش مقنعة
والغش وِش للي مَـ لوش أخلاق
الماضي مَيِّل ضَهرُه للبردعة
وحاضرنا مرمي عَـ الملاء أشلاء
دراما فارضة إيقاعها عَـ الجاري
بضحكة عالية علينا مش لينا
ياريت العقل يبقى مش داري
عدم درايتُه رحمة تلهينا
مؤمن ولكن جَنِّتُه نارُه
تفتكري يفرح ولّا يبقى حزين؟
ومهما يشرح كل أعذارُه
أوزارُه زارعة للحقيقة عينين
نظرتها لينا كاشفة أروحنا
نجْمَع فْـ بعض زمنَّا يطرحنا
وليلنا نازل كَيّ فْـ جراحنا
صباحنا يسأل
الشمس راحت فين؟
وازاي تغيب
لو دُوُل صحيح حبيبين؟
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
