الاسم سلوى صلاح الشهيرة ب سلوى العينى
شعر عامية
المنصورة
(( فرقع لوز ))
وعامل فيها فرقع لوز
ماشفتش منه يوم يفرح
راجل ناقص بألفين بوز
مع الستات غزال يمرح
ولما أحاول أنكش فيه
بيرمى كلام ماسخ يجرح
أدارى وجعى وأخبيه
وأقول جايز ف يوم أربح
ولما خيالى يوم يشطح
وأتمنى خروجه معاه
يقول باين عليكي خلاص
برج من دماغك تاه
وع الماسجات عامل عنتر
تقول مرهم وروح سكناه
بيستظرف ويتوانس
وبيكلم حريم فاكراه
بارم ديله فى قلب البيت
مهند مين تقارنه معاه
كريم وحنين وحبوب
راجل فييس ماعندوش لا
فارس عايش علي الفيس بوك
فارد قلعوا بدون معانا
وبيناغش وبيهزر
ويبعت قلب بيكركر
يقول ياحبيبتي وحشانى
وقلبي ف لوعه بيعانى
ياصوت كروان واخدنى بعيد
ومن غيرك دا قلبي وحيد
عملت له صفحه ع الفيس بوك
وفهمته إن أنا عشقاه
طلب صورتى وأنا لوحدي
بقينا صحاب وراحتى معاه
قعد يشكي لي أحواله
وقرف مراته وعياله
وإني خلاص بقيت راحته
وجنة قلبه ومساحته
ومستمتع حديثي معاه
وكل همه يراضيني
ويجيب اللى أنا عايزاه
في عيد الحب كلمني
وقالي أنا عشقه آه ودواه
ونور عينه وتكعيبته
ونور الشمس ااااه وسماه
وأنا من قهري أتأمل
وأقول مش دا اللى أنا وخداه
ياخدك عزرائيل يابعيد
ويقبض روحك قبل العيد
ياعرة ياخيبه آه ياكئيب
سلوك عقلك فيها تخريب
داخل بيتك كأنك ديب
نكد داخل نكد طالع
كأني في سجن بابه حديد
ولو افتح معاه موضوع
هاتك يازعيق هاتك يانهيق
حياه سوده شقا ومعناه
ماشفتش منه يوم راحه
ولا في حياتى مرتاحه
وبتحمل وأقول يمكن
دا إبتلاء من عند الله
