قصيدة : فنجان غلب . مسابقة الشعر العامي بقلم / إيمان مصطفى

للمشاركة في مسابقة همسة

الإسم / إيمان محمود قاسم
إسم الشهرة / إيمان مصطفى

فئة قصيدة العامية

فنجان غلب

مخنوق ومسلّم إحساسي
وبماشي الدنيا دي وماشي
من شغلي لبيتي ولعيالي،
والروح جوايا
ماحساشي
ولا فارق وياها وجودي
متسستم والشقى مولودي
وصاحبي الأنتيم
مغروس في الطين
وهموم الدنيا على كتافي
قلبي الحافي دابت رجليه
بيدور ع اللي في يوم يلاقيه
أو يشعر بيه
متخفّي ورا دخان الروح
وسيجارتي العود اللي ساندني
باخلص للدنيا …
تعاندني
وتشيل وتحط وترميني
على تل حاجات
والاحتياجات كسرت عيني
كل ده ومسلّم..
وبصبر نفسي بنفسين
على فنجان غُلْب مضحكني
مع إني
في الأصل حزين
في إيديا السكين
والسكين
متسلط على باب شرياني
نفسي ادبح م الروح أحزاني
إذ فجأة .. وألطف بينا يا لطيف
مدفع رشاش
قطر وقشاش
والحيطة اللي سَنَدْت عليها
على راسي تهيل
وسمعت موشح م التهبيل :
طلقني.. زهقت الحمل تقيل
والروح بتروح
ضغوطات وجروح
ومافيش تقدير
وسايبني لوحدي
و باتألم
أحلامي اللي كانت بتعلّم
في الكون والناس
قلبي الحساس
وجمالي اتبدل بهموم
كل ده بقى كوم
وتجاهلك ليا لوحده ده كوم
بقى بالمعرف ياللا نفارق
كفاياني مرار
أنا مت وبنياني بينهار
ومفيش تقدير
ولا كلمة بتبل الريق منك
واكمنك راجل على راحتك
تسهر وتجيني مشَطّب جاز
وان جاز لي
اشتكي مبتسمعنيش
بتسدّ ودانك
ماتشوفنيش
وأنا ناري بترعي في نبضي الحي
صبرتني ياما وقلت هاييجي
فلقيتك..
كالعادة مابتجيش
العيشة معاك كلها خرابيش
نَهَشتْنِي وجبت خلاص آخر
من فضلك ابعد
واتاخر
يمكن ألقاني.. ومن تاني
أرجع واخْضَرّ
طلقني واقصّر يبنا الشر
زعلانة
ومن حقك طبعا
فضفضي وانتفضي وحطي حمولك وارتاحي
ياحبيبتي ياسندي ومفتاحي
وبابي المقفول
ياشريكة في شركة ماكسبتشي
قررتي خلاص إنك تمشي
وتسيبي اللي اتعلق بيكي .. ودَبّ جدوره
هاتهِدي السور ينطفي نوره
من حقك ياشريكة الشيلة
قبل ماتمشي
أنا هاحفر قبري وأحطني فيه
بس وصيتي
تيجي تقري عليه
وبلاش تفتكري إني جرحتك
آخر حاجة :
أقسم بالله أنا حبيبتك
بس الدنيا اللي ماحبتنيش
شبعت فيا هبد وتلطيش
غصبٍ عني
كلِّك مني
وإزاي من بعدك هاقدر أعيش
اسم الله عليك
وكفى الله الشر
الدنيا بخير
في إيه مالك ؟
وسامحني أنا غصبن عني باثور
إن شالله يخليك لعيالك
إوعاك تزعل مني يانضري
أنت عارفني
باطلع طلعتي
وآجي على مفيش
مع بعضنا هانعافر ونعيش
وهاتتعدّل
بين لحظة ولحظة بتتبدّل
بس أنت تخلّى بالك مني
وأنا بردوخلي عليك بالي
وعوضنا عليه
راضيين والرضا جنة وبساتين
ربك هايعين
نصبر وهنكسب دنيا ودين