ليه يا زمان عهد الجمال
من الوجود راح والخيال
حتى الطرب اصبح محال
لما انكتب لولاد عيال
فين الهيام فين الغرام
فين المعاني في الكلام
فين الأغاني يا حرام
دي بهزتين تتقال قوام
فين الطرب بتاع زمان
معادش له بينا مكان
دلوقتي بس والله الجنان
عمال يكسر في الودان.
ايام زمان مش أي حد
غنى وقال اطرب بشر
مش أي حد ترك بجد
على القلوب بصمه وأثر
دلوقتي كل واحد بقول
عن نفسه سيد المطربين
فكره بغنوه راح ينول
حب البشر والمعجبين
ايام زمان كان مستحيل
في المغنا يظهر صوت جديد
إلا إذا كان صوت جميل
مالوهش بالصيت والرصيد
برضه الكلام مش ده الكلام
اللي انكتب ايام زمان
ولا الغرام هو الغرام
ولا الحنان هو الحنان
المغنا كان حلو وجميل
والفن كان مشغول بحب
حتى القلوب جيل بعد جيل
حافظه الكلام عن ظهر قلب
معقول خلاص الفن راح
والمغنا راح ويا الرياح
معقول خلاص حتى الصياح
اصبح غنا وأصبح مباح
د. أسامه مصاروه
