خاص بمسابقة همسة
شعر العامية
الإسم /إيمان محمود قاسم
إسم الشهرة/إيمان مصطفي
جمهورية مصر العربية
تلفون /+201098350763
قبل ماتعلمنى أحبك
قبل ماتعلمنى أحبك
كنت حط حدود لشوقى
كنت لما تشوف مشاعرى
وهيا فايره
تقولي… روقى!
كنت أخرت ف شروقى
لدنيا فانية
فرق توقيت السعادة
بينحسب بالفمتو ثانيه
كنت فسرت لعيونى
لون حقيقتك
لجل لما تغيب عليها
متنحرقش بصهد غيبتك
كنت سبتك….!
وانتصرت لكبريائى
ولو بضيقى
كنت لملمت اللى باقى منى
ورجعت لطريقى
قبل ماتعلمنى احبك!
قبل ماتعلمنى احبك
كنت سايقه دنيتى براحتى
وكيفي …
كنت متصالحة وفايقه
رايقه زى النسمه صيفى
كنت طايره بدون جناح
كان ف عينى الكون براح
كنت مالكه زمام زمانى
كان خيالى المعجبانى
عقد ملضوم
بالنجوم
ورد طارح بالأمانى
ضحكه
بتزيح الغيوم
لحن متغنى لشروقى
يغزل النور للصباح
كان حقيقى
كل لحظة تمر فرحة تبل ريقى
كان طريقى كل خطوه
براح خضار
قلبى طارح بالعمار
قبل ماتعلمنى احبك!
قبل ماتعلمنى احبك
كنت قبله
تخلى قلبك
فى رحاب العشق ناسك
أصل محراب الأحبة
له مناسك ….
له طقوس ….
مستحيل أبدا
يدوس
قلب أخلص فى الغرام
قلب مش غاوى الملام
قلب خام…!
زى طفل عنيه بريئه
ضيها مليان بشاير
جايه ع الأفراح تشاور
وانصدم وسط الزحام
