قصيدة : قرار بعد انتظار . للشاعرة / وفاء علي

فكت ضفاير شَعرها

نسجت حبيبها م الخيال

ضاعت براءة حلمها

واتغزلوا فيها الرجال

صابها الغرور واتصورت

ملامحها لما اتغيرت

هتدوم لآخر عمرها

وهتبقى ملكة للجمال

مرت ساعات وساعات كمان

والروح بقت متشققة

صبحت جدايل شعرها

تشبه حبال المشنقة

خرجت خلاص م الشرنقة

والدم هاجر م العروق

عاشت سنين تزرع مرار

ومسيرها كانت ليه تدوق

زالت خلاص كل الفروق

واتجمعت كل العروق واتوحدوا

مابقوش خلاص يتجددوا

واتجمدوا زي الحديد

مابقاش وجودهم يوم يفيد

والعجز بيبان جوه روحها من جديد

جدلت ضفاير شعرها

واستسلمت

حست ملامح وشها

نطقت كمان واتكلمت

اخدت قرار

بعد انتظار

ماتفك ابدا يوم ضفاير شعرها

ولا حتى هتسيب قلبها للناس سبيل

رجعت بريئة وصممت

ما ف يوم لحب خسيس تميل

ده الحب لما يكون حلال

مش بس لاجل جمال ومال

تلقى المشاعر في احتلال

من غير ما تحتاج يوم دليل