قصيدة : قلبي الموعود . مسابقة الشعر العامي ..بقلم / نصر سرحان طاحون

فرع الشعر العامي

الاسم// دكتور/ نصر عبد العزيز طاحون
إسم الشهرة/نصر سرحان طاحون
الدولة/مصر
محمول/ 01009569039
واتس آب/01009569039
صفحة الفيس بوك
https://www.facebook.com/share/1FFPaK6imT/
عنوان القصيدة

(قلبي الموعود)

غسلت قليبي من الأحزان
دهنت حيطانه بالألوان
وسلمت الهوى مفتاح

وقلت تعالى..هات ف إيديك
ربيع القلب من الشبابيك
وسافر من براح لبراح

وحاسب من عطاش الشوق
دي ناره في الرَقَابي طُوق
بتِسبِي العقل والأرواح

لقيت القلب طار فرحان
وخَلْفه في الخيال إنسان
بيضحك له في كل صباح

وياما قلوبنا بترفرف
تبوح بالسر وتخطرف
وتعشق كُل فَجْر مِلاح

أتاري القلب دا موعود
لا بيكمل ولا بيعود
وعايش لِلهوى مَلَّاح

ينادي عليه فيفتح له
ويِأنَس بيه ويرتاح له
وفجأة يسيبه وِسط ريَاح

فيرجَع تاني باب مقفول
يعيش في الضلمة و المجهول
ويصبح متوى للأتْرَاح

وتيجي المطرة من تاني
فتغسل قلب أحزاني
ويرجع بالغُنا صدَّاح