قلبي حيطان مدهونة جير
مرسوم عليها جمل
ومركبه وعصافير
وخمسة وخميسة
وبرج حمام
وزرع ينسون علي حرف بير
وخط أحمر بإيد
(صلي علي النبي)
وقلب أبيض
وسهم مع حرفين
بصوابع التباشير
وذكرى بنت وولد
وذكرى دفعة جيش
وكلمتين حرية
مع ثورة لحظة طيش
قلبي أتمللي خرابيش
وعياط كمنجات
وأوليا
وأدعيا
ودراويش
وفاضت محبتك
على توب مهلهل خيش
فزعنى حبك مدد
حى
وقررت بيكى أعيش…
مدوخانى سفر
مدوخانى أنتظار
واقف ولابيديش
نبت ف قلبي جناح
مستنى
تيجى بريش!!!!!!!
