عاجل \ قلق والع
بيهِب م التفاصيل
و يهج للشارع
و مخاض حاجات ياما
يمكن تكون ثوره
يمكن بروفة حلم
يمكن مفيش حاجه
عاجل
صريخ ف الجو
ريحة وطن بيشيط
عاجل \ مواسم عشق
طرحت على الكورنيش
حكايات و ما بتخلصش
بيادات بتتوحم
على قلوب ثوار
مرميه ف الشارع
عاجل \ قمر طالع
بهتان و بيكمل
دورانُه ف السموات
مين اللي مات بُكره
مين اللي فينا ما ماتش
و حيخترع هتافات
المجد للأموات
ساعة ما حيقوموا
و يسِبُّوا للتفاعيل
روح الخليل ع الأرض
مَسِّتني على سهوه
مستفعلن فعلن
مستفعلن فعلن
يمكن كلام عابر
يمكن نبي كافر
يمكن مفيش حاجه
عاجل \ دموع بتبل
صدر القميص ع الضل
و تبَوَّظ الألوان
فبيترِكن ع الحيط
مع كاس نبيت فاضي
المجد للكاروهات
لون الوجع كاروهات
لون الدموع كاروهات
لون الوطن كاروهات
مات اللي مات عادي
الموت كمنجاتي
و مكمل النوته
لِحَد آخر حرف
عينُه الشمال بترِف
عينُه اليمين تنطرِف
بيكمل الصولوهات
يمكن يموت دلوقت
يمكن يخونُه الوقت
يمكن مفيش حاجه
عاجل \ غضب طارح
نشابه و مطارح
طبة عجين ف الطشت
و رغيف و بيضه برُشت
و مقرفصه الستات
تتهجى ف الحواديت
و فرن م الجرانيت
قاعد بيستَنَّى
نار الونس و الرَغيّ
من فوق سطوح البيت
يمكن تكون أحلام
يمكن تكون حاله
يمكن مفيش حاجه
عاجل \ مشاهد خوف
و نشيد جديد ع الأرض
لقزايز المولوتوف
و كاوتش ع الأسفلت
من نارُه ناس تانيين
م المركونين ف الطَل
من بياعين الفُل
و بيان رئاسي مُمِّل
بيكهرب الميادين
يمكن تكون نكته
يمكن نبوءة ولي
يمكن مفيش حاجه
