أميمة سلطان
الاسم أميمة محمد علي
أميمة سلطان
الدولة. مصر
مسابقة مهرجان همسة الدولي للاداب والفنون
الشعر العامي
قلم تالت
……..
قلم أوّل كسر قلبي
قلم تاني كسر روحي
وبين لتنين حاجات ماتت
عايزني ازاي أكون قادره
واتحمّل قلم تالت؟!
ماصدّقت السنين فاتت
على الجرح اللي عمره ما خف
كما التِعبان قدرت تلف
على قلبي وتكسرني
ف أوّل مرّه جيت تجري
بدبله وقولت حبّيتني
يادوب كام شهر ولقيتني
وقعت ف قلب دوّامه
خيانه وذل ومهانه
وبيها كسرتلي قلبي
أكيد ذنب الوفاء ذنبي
لكني قدرت أتعكز
وافارقك ضعف مش قوّه
مشيت باسند على الخظوّه
واكمّل رحلتي وحدي
شهور فاتت على صمتي
وقِلّة حيلتي وجراحي
ورغم الجرح كان صاحي
قدرت تعود وتخدعني
سامحتك برضه من قلبي
ف دي المرّه كسرت الروح
خيانتك زي باب مفتوح
على البحري بدون ترباس
ف سيبني لواحدي يابن الناس
وروح لطريقك الضلمه
خلاص ضاعت حاجات منّا
وقصّتنا اللي مكتوبه
على ورق الحياه باشت
حاجات فعلا كتير ماتت
وصدّقني مانيش ح اقدر
أخش الفيلم من تاني
ولا ح اقدر برغم الشوق
أشوف منّك ..
قلم تالت
