للإشتراك في مسابقة همسة الدولية
الإسم / محمود أحمد حلمي العسيلي
اسم الشهرة / طلعت العسيلي
01096507414
الفئة / عامية
” قيود من دهب “
قفص جميل من دهب
و داخله عصفوره
ريشها جميل ألوان
بيكمل الصوره
مرجيحه متعلقه
للعب و الشعلقه
و الميه ف المسقى
و الحبه منثوره
و قصاري ورد جميل
و لمبتين قايدين
فايح عبير الورد
و جمال بيسبي العين
ف تراس جميل بيطُلْ
على قصر أسواره
مكسيه ورد و فل
و بداخله سنيوره
نايمه فى غرفتها
فى كل يوم تصحى
تبص م الشباك بنظره مقهوره
نادت بصوت مخنوق
ممكن يا عصفوره
أبقى أنا إنتي
و تبقي سنيوره ؟
قالت لها موافقه
يا ريت يا سنيوره
يسيبوني بره أطير
و أقَفْ على اﻷسوار
مع الورود و الفل
و ف كل طلعة شمس
أنده عليكي و أطُلْ
* قولي يا سنيوره
إيه اللي هايفيدك
لو تدخلي قفصي
و تعيشي في تراثي
و ساعتها نتساوى راسك مقام راسي ؟
* شوفي يا عصفوره
القيمه مش فى المكان
القيمه جوه الكيان
ما يهمنيش قصري
بأسواره العاليه
عايزه أنا و انتي
نطير في حريه
تزقزقي ف الفضا
و اصرخ مع صوتك
بعزم ما فيا
قولي لسجانك
و أقول لحراسي
فكوا القيود عننا
ﻻزم نعيش عمرنا
بكل حريه .. بكل حريه
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
