ابراهيم ابراهيم يوسف عشري
الشهره ابراهيم عشري
مصر / بورسعيد
صفحة الفيس بوك
https://www.facebook.com/ebrahim.ashry
01207101111
01011118714
شعر عاميه
كان زمان الدنيا حلوه وكنا شايفين فيها خير
كان زمان الناس جميله وكنا نحترم الكبير
كان زمان الدنيا فعلآ جد غير
شئ جميل
ترجع الذكري اللي كانت جوه قلبي عن زمان
ذكري باقيه لكل واحد بـ الزمان وبـ المكان
كت حارتنا يعني ياما مـ الحبايب والجيران
كان ضمان الحب مطبوع فيه صورتنا
كنا حاسين بـ السعاده فـ كل تفصيله فـ حياتنا
حتي بيتنا كان لاممنا فـ كل ليله وكل جمعه
نفتح الفيلم القديم إن كان شكوكو ولا سمُعه
وأمي سامعه صوت بابور الجاز بيطبخ قلبها الشقيان علينا
يـ يجي ابويا بـ حاجه حلوه ضحكته تضلل علينا
كان حامينا
وكانت الدنيا ضيفتنا
كت جارتنا طبقها داير عـ العماره
مره محشي مره بطه مره تفليته وبصاره
كنا نستناه بـ شوقنا
وريحة الاكل اللي فايحه عند بابها دي الاماره
يعني بـ صريح العباره نفسي أحكي
عم فتحي كان بـ يفرش ضحكته قبل الحرنكش
كان يعبي بأيده لينا وكان بـ يكبش
كنا نـ نكش فيه وناكل منه حبه
كان يزود فوق طلبنا بأيده فوق الحبه حبه
كنا نجري ونـ ستخبي فـ أي بيت مـ الكل بيتنا
كنا عيله كبيره فعلآ ساكنه مع بعض فـ حارتنا
كنا ناخد اللي ناقص للـ طبيخ من بيت جارتنا
ما هوه أصل زيتهم هوه زيتنا
حتي جدتنا اللي كانت تبدر الحُب في صواني
تعجن الحِنيه بيها يـ تمَلَي القلب بـ أماني
ترسم النقشه بأيديها يطرح البسكوت أغاني
كان حصاني مـ الخشب وانا كنت فارس
كنت عاشق للخروج ويا النوارس
كنت حاسس بـ الدفا طول الشتا ولـ حد مارس
عم حارث كان يجيب سطل اللبن عـ البيت يوماتي
كنت أجيب كساروله فاضيه يصُبلي أحلام حياتي
حتي بياع الجيلاتي كان بييجي يقوم مـ زمر
كان يـ بيع لينا في حكاوي
محطوطه فـ بسكوت مكسر
كنا بنقول عم انور هاتلنا حبة سعاده فـ كل لون
هاتلنا اللون اللي طارح بـ المحبه فـ الف كون
كت تهون الدنيا واحنا بـ البراءه مكملين
الف قصه والف ذكري وحبه احلام كدابين
ليه سحبنا العمر فيها جوه دوامة السنين
ليه يا رب مـ كنش ينفع نبقي فيها صغيرين
ولسه بسأل نفسي تاني
عاوز ارجع ليه
صغير بعد سن الأربعين.
