قصيدة : كما تدين تدان .. مسابقة الشعر العامي بقلم / أسماء يسري مخيمر

في مثل بيقولك ايه ؟!

قلبي على ولدى انفطر

وقلب ولدى علي حجر

الأب يشقى ويتعب علشانك

لأجل يكبرك وتعرف مكانك

في الحياه الواسعة الطويله

من صغرك عمره ما هانك

ومن غير ما تطلب يجيلك

جنبك ووقت الشده يشيلك

بيحافظ دايما على العيله

ولا سابك ولا شاف بديلك

بيتمنى تكون احسن منه

ولا قال انك تشيل عنه

حابب الايام إلى جياله

معاك ولا تعب برغم سنه

علشان انت إلى فاضل له

يديك بزياده وكتافه شياله

وكفة ميزانه مش مياله

عاقل وحكيم وكلمة عداله

يديك وتصرف وظروفه محاله

وانت في النهايه ناقص ربايه

بنى آدم عاق مع اب محتاج رعايه

ضحى علشان تعيش حياه جميله

وسبت دمعته على خده في النهاية

بس الدنيا دى والله زي المرايا

بتعكس حلوها عليك في البداية

ولما تكبر توريك شكلك الحقيقي

بتجعيد وشك إلى زى الحدايه

وكما تدين تدان اتقالت لبنى الإنسان

إللى عمله في غيره ها يتعمل فيه كمان

ومش ها يعرف يهرب من مصيره

انكتب عليه يشوفه في الزمان